काठमाडौं । नेपालले ग्लोबल प्लेटफर्म फर एक्सेस टु चाइल्डहुड क्यान्सर मेडिसिन्सअन्तर्गत बाल क्यान्सरमा उपचार हुने अत्यावश्यक औषधि प्राप्त गरेको छ । नेपालले पाउने ३५ मध्ये पहिलो चरणमा आइतबार राति दश प्रकारका औषधि ल्याइएको हो ।
 
स्वास्थ्य तथा जनसंख्या मन्त्रालयका प्रवक्ता डा. प्रकाश बुढाथोकीले पहिलो चरणमा दुई हजार तीन सयभन्दा बढी प्याक नेपाल आइपुगेको जानकारी दिए । यसपछि चरणवद्धरूपमा नेपालले क्यान्सर उपचारका लागि पाँच वर्षसम्म निरन्तर ३५ प्रकारका अत्यावश्यक गुणस्तरीय औषधि निःशुल्क पाउनेछ ।
 
विश्व स्वास्थ्य संगठन (डब्लूएचओ) नेपालस्थित कार्यालयले ‘सेन्ट जुड चिल्ड्रेन्स रिसर्च हस्पिटल’सँग समन्वय गरी औषधि खरिद गरेको हो । औषधि भक्तपुर क्यान्सर अस्पताल, कान्ति बाल अस्पताल, पाटन स्वास्थ्य विज्ञान प्रतिष्ठान र भरतपुर क्यान्सर अस्पतालमा उपचाररत बालबालिकाले निःशुल्क पाउनेछन् ।
  
रक्त क्यान्सरका विभिन्न प्रकारसहित आँखामा हुने (रेटिनोब्लास्टोमा), मस्तिष्कसम्बन्धि (न्यूरोब्लाष्टोमा) लगायत ६ वटा क्यान्सरको केमोथेरापीमा प्रयोग हुने अत्यावश्यक औषधि हुन् ।

डब्लूएचओका अनुसार नेपालमा हरेक वर्ष करिब नौ सय नयाँ बालबालिकामा क्यान्सर देखिने गरेको छ । सरकारले गत मंसिर १ गतेबाट लागु हुनेगरी चारवटा अस्पतालबाट १४ वर्षमुनिका बालबालिकाको क्यान्सर उपचार निःशुल्क गर्ने घोषणा गरेको छ ।

स्वास्थ्य तथा जनसंख्यामन्त्री पौडेलले निःशुल्क औषधिमार्फत् बाल क्यान्सरका कारण हुने मृत्युदर नियन्त्रणमा सहयोग पुग्ने बताए । “कोही पनि बालबालिका आर्थिक अभावमा क्यान्सरको उपचारबाट बञ्चित नहोउन् भनेर हामीले निःशुल्क उपचारको व्यवस्था पनि गरेका छौं,” मन्त्री पौडेलले भने ।