बेलबारी (मोरङ) । कोसीटप्पु वन्यजन्तु आरक्षमा यस वर्ष चराको संख्या बढेको छ । आरक्ष र आसपासका क्षेत्रमा हालै गरिएको गणनामा विगतको तुलनामा यस वर्ष चराको संख्या बढेको हो ।

कोसीटप्पु वन्यजन्तु आरक्ष कार्यालयका अनुसार, गत पुस २६ देखि माघ १ गतेसम्म ‘मिडविन्टर वाटर वर्ड सेन्सस–२०२५’ अन्तर्गत आरक्षलगायत कोसी नदी क्षेत्रमा गरिएको गणनामा ७६ प्रजातिका नौ हजार २५० को चरा फेला परेका छन् ।

गत वर्ष ५३ प्रजातिका पाँच हजार ५२७ चरा फेला परेका थिए । गणनाका क्रममा यस वर्ष सबैभन्दा धेरै चखेवा जातका चरा एक हजार ६८ र सबैभन्दा कम सेतोकण्ठे गरुड, पानीचाहा, चित्रांगद र फुस्रो टिकटिके चरा एउटा–एउटा मात्र फेला परेको आरक्षका वरिष्ठ संरक्षण अधिकृत रामदेव चौधरीले बताए ।

सन् १९८७ देखि हुँदै आएको गणनामा जलपक्षीका प्रजाति, तिनको संख्या र बासस्थानमा देखिएका समस्याजस्ता जानकारीको अभिलेख राखिने उनले बताए । सुरक्षित बासस्थान, पर्याप्त आहारा, सिमसारको संरक्षण र मानव चहलपहल कम गर्न सके सिमसार खोलानालामा आगन्तुक चराको संख्या बढ्ने राष्ट्रिय प्रकृति संरक्षण कोष कोसी संरक्षण केन्द्रका प्रमुख वीरेन्द्र गौतमले बताए ।

उनले असोजदेखि अन्यत्रबाट पर्यटक चरा पुससम्म आउने क्रम जारी रहने र चैत लागेसँगै फर्किने बताए । सुनसरी, सप्तरी र उदयपुरको संगमस्थलमा रहेको कोसीटप्पु वन्यजन्तु आरक्ष चराको राजधानी बनेको छ । करिब ५० प्रजातिका बटुवा चरा कोसीटप्पु, चितवन राष्ट्रिय निकुञ्ज, बिसहजारी, जगदीशपुर, घोडाघोडी ताल, शुक्लाफाँटा वन्यजन्तु आरक्ष तथा कोसी, गण्डकी, नारायणी नदी क्षेत्रमा रहने केन्द्रप्रमुख गौतमले बताए । रासस