काठमाडौं । एमाले महासचिव शंकर पोखरेलले माओवादी केन्द्रका उपमहासचिव वर्षमान पुनसँगको टेलिफोन वार्ताबारे प्रस्टीकरण दिएका छन् । नेताहरूका बीचमा शिष्टाचारवश हुने कुराकानीलाई वर्षमानले ‘एमाले महासचिवको याचना’का रूपमा प्रचारबाजी गरेको भन्दै पाेखरेलले आपत्ति जनाएका छन् । 

• पुनलाई पोखरेलले ‘टेलिफोन गरेर मागे सहयोग’

‘‘पार्टीको जिम्मेवार नेताले कतिपय सवालमा समय– समयमा आवश्यक ठानिएका व्यक्ति र पक्षसँग अनौपचारिक रूपमा कुरा गर्दछ,’ पोखरेलले सामाजिक सञ्जालमा लेखेका छन्, ‘‘अनौपचारिक रूपमा गरिएका कुरा सार्वजनिक खपतका विषय नहुन सक्दछन् । त्यस्ता कुराकानीलाई सार्वजनिक गर्नु उचित मानिँदैन ।’’

सहयोग र याचना गर्नुपर्ने आवश्यकता भएको अवस्थामा पनि वर्षमानसँग नभएर सिधै माओवादी अध्यक्ष पुष्पकमल दाहालमार्फत नै हुने उनले उल्लेख गरेका छन् । उनले थपेका छन्, ‘‘आवश्यक ठानिएको विषयमा अहिले पनि हुँदै पनि आएको छ । जस्तो: संक्रमणकालीन न्यायको विषयमा ।’’

राष्ट्रिय शक्ति निर्माणको आवश्यकता र औचित्यका विषय उल्लेख गर्दै उनले विगतमा नेताका टाउका जोडेर गरिएको पार्टी एकता असफल भएकाले अब पुनः त्यही काम गर्नु उचित नहुने बताएका छन् । उनले थपेका छन्, ‘‘कार्यकर्ताका मन जोडेर बलियो कम्युनिष्ट आन्दोलनको निर्माण अबको बाटो हो । वर्षमानजीलाई फोन गर्नुको अन्तर्य त्यसका लागि वातावरण तयार गर्नु पनि त हुन सक्दछ ।’’