वासिङ्टन । एक अमेरिकी न्यायाधीशले शनिबार आकस्मिक आदेश जारी गर्दै एलन मस्कको सरकारी सुधार टोलीलाई ट्रेजरी डिपार्टमेन्ट (अर्थ मन्त्रालय)मा भण्डारण गरिएका लाखौँ अमेरिकी व्यक्तिगत र वित्तीय तथ्यांकमा पहुँच नदिन निर्देशन दिएका छन् । 

अमेरिकी जिल्ला न्यायाधीश पल ए. एन्जेलमेयरको आदेशमा ट्रेजरी डिपार्टमेन्टको भुक्तानी प्रणाली र अन्य तथ्यांकमा पहुँच ‘सबै राजनीतिक नियुक्ति, विशेष सरकारी कर्मचारी र ट्रेजरी विभागबाहिरका एजेन्सीबाट सरकारी कर्मचारी’ लाई सीमित गरिएको छ ।

फेब्रुअरी १४ मा हुने सुनुवाइसम्म लागु हुने अस्थायी प्रतिबन्धात्मक आदेशमा राष्ट्रपति डोनाल्ड ट्रम्पको जनवरी २० को उद्घाटनपछि ट्रेजरी डिपार्टमेन्टको रेकर्डबाट डाटा प्राप्त गर्ने कुनै पनि व्यक्तिले डाउनलोड गरिएका सामग्रीको कुनै पनि र सबैप्रति तत्काल नष्ट गर्नुपर्ने उल्लेख छ ।

विश्वका सबैभन्दा धनी व्यक्ति मस्कले राष्ट्रपति ट्रम्पले घोषणा गरेको ‘डिपार्टमेन्ट अफ गभर्नमेन्ट एफिसियन्सी (डीओजीई)’अन्तर्गत रही ट्रम्पको संघीय लागत कटौती प्रयासको नेतृत्व गरिरहेका छन् । 

रिपब्लिकन पार्टीका राष्ट्रपति, डिपार्टमेन्ट अफ ट्रेजरी एन्ड ट्रेजरी सेक्रेटरी स्कट बेसेन्टविरुद्ध १९ राज्यका महान्यायाधिवक्ताले शुक्रबार मुद्दा दायर गरेका हुन् ।

उनीहरूले प्रशासनले मस्कको डीओजीईका कर्मचारीलाई संवेदनशील ट्रेजरी विभागको तथ्यांकमा पहुँच विस्तार गरेर कानुनको उल्लंघन गरेको आरोप लगाएका छन्।

टेस्ला, स्पेसएक्स र एक्सका प्रमुख न त संघीय कर्मचारी हुन् न त सरकारी अधिकारी नै हुन्, यद्यपि अमेरिकी सञ्चारमाध्यमले यसै महिना मस्कलाई ‘विशेष सरकारी कर्मचारी’का रूपमा दर्ता गरिएको रिपोर्ट गरेका थिए । डीओजीईले सरकारी विभागको रूपमा काम गर्न कंग्रेसको अनुमोदन आवश्यक पर्दछ ।

ट्रम्पका शीर्ष दाता तथा सहयोगी मस्क र उनको टोलीले नयाँ प्रशासनको पहिलो हप्तामा संघीय एजेन्सीमार्फत विदेशी सहायता कार्यक्रम रोकेको, बजेट कटौती गरेको र सयौँ सरकारी कर्मचारीलाई हटाउने प्रयास गरेका छन् । रासस/एएफपी