काठमाडौं । मर्स्याङ्दी नदीमा निर्माण हुने ९० मेगावाटको अर्धजलाशययुक्त जलविद्युत् आयोजनामा वित्तीय व्यवस्थापनको टुंगो लागेको छ । चार बैंक तथा वित्तीय संस्थाले १०.५० अर्ब रुपैयाँ लगानी गर्नेगरी वित्तीय व्यवस्थापनको टुंगो लागेको हो ।

कुमारी बैक लिमिटेडको अगुवाइमा लगानीसम्बन्धी सम्झौतामा शुक्रबार (माघ १८ गते) हस्ताक्षर भएको छ । लगानी सम्झौता एम. ए पावर प्रा लि का अध्यक्ष अनुप आचार्य र कुमारी बैक लिमिटेडका प्रमुख कार्यकारी अधिकृत रामचन्द्र खनालको उपस्थितिमा कुमारी बैक लिमिटेड, प्रभु बैक लिमिटेड, कृषि विकास बैक लिमिटेड र सिद्धार्थ बैक लिमिटेडको संयुक्त लगानीमा हुनेगरी ऋण सम्झौता भएको हो ।

हाल चार वित्तीय संस्थाबीच सम्झौता भए पनि केही समयभित्र अन्य बैक तथा वित्तीय संस्थाहरूले पनि लगानी गर्नेछ । निर्माण अवधिको ब्याजसहित कुल २० अर्ब २५ करोड रुपैयाँ लागत अनुमान गरिएको आयोजनामा ७५ प्रतिशत ऋण र २५ प्रतिशत स्वपुँजी लगानी हुनेछ ।

प्रवर्द्धक कम्पनीका अनुसार ऋण लगानीतर्फ कुमारी बैक लिमिटेडले चार अर्ब, प्रभु बैक लिमिटेडले तीन अर्ब, सिद्धार्थ बैक लिमिटेडले दुई अर्ब र कृषि बिकास बैक लिमिटेडले १.५ अर्ब लगानी गर्नेछन् ।

आयोजनाको नेपाल विद्युत् प्राधिकरणसँग २०८० साल कार्तिक १ गते विद्युत् खरिद बिक्री सम्झौता सम्पन्न भइ व्यापारिक उत्पादन २०८६ साल वैशाख २२ मा रहेको छ ।

आयोजनाबाट उत्पादित विद्युत् विद्युत्गृहदेखि २२० केभी सिंगल सर्किट प्रसारण लाइनमार्फत ११.६ किलोमिटर दुरीमा नेपाल विद्युत् प्राधिकरणको मार्किचोक सब–स्टेसनमा २२०÷१३२ केभीमा जोडिने छ ।