काठमाडौं । निजी मेडिकल कलेजमा कार्यरत आवासीय चिकित्सकहरूले आफूहरूमाथि श्रमशोषण भएको जनाउँदै विरोधमा उत्रिएका छन् । स्वास्थ्यकर्मीका लागि सुरक्षित कार्यस्थल संघर्ष समितिले बुधबार माइतीघरमा विरोध प्रदर्शन गरेको हो ।

उनीहरूका नारा छन्– स्वास्थ्य र शिक्षामन्त्रीले गरेको पछिल्लो निर्णय फिर्ता गर, बन्डिङ प्रथा  बन्द गरौँ, डाक्टरलाई बन्धक बनाउन पाइँदैन ।

यही माघ १४ गते स्वास्थ्यमन्त्री र शिक्षामन्त्रीको बैठकले निजी मेडिकल कलेजमा स्नातकोत्तर अध्ययन गर्ने आवसीय चिकित्सकको निर्वाहभत्ताबारे सिफारिस गर्ने निर्णय गरेको थियो । निर्णयमा पारिश्रमिक कम्तीमा पहिलो वर्ष २५ हजार, दोस्रो वर्ष ३० हजार र तेस्रो वर्ष ३५ हजार उपलब्ध गराउनुपर्ने उल्लेख छ ।

सोही निर्णयमा छात्रवृत्ति निर्देशिकाअनुसार, निर्देशिका प्रदान गर्ने र निःशुल्क अध्ययन गर्न चाहे विद्यार्थीलाई अध्ययनपछि दुई वर्ष सोही शिक्षण संस्थामा कबुलियत गरी सेवा गर्नुपर्ने उल्लेख छ ।

मन्त्रीद्वयका यी निर्णय आफूहरूलाई स्वीकार्य नभएको संघर्ष समितिले जनाएको छ । मंगलबार समितिले विज्ञप्ति जारी गर्दै निर्णय फिर्ताका निम्ति २४ घण्टे अल्टिमेटम समेत दिएको थियो ।

तर, माग सम्बोधनमा कुनै निकायले चासो नदेखाएपछि अब क्रमबद्ध रूपमा आन्दोलनका कार्यक्रम तय गरिने समिति संयोजक डा. शेषराज घिमिरेले बताए । आफूहरूको यो निर्णायक आन्दोलन हुने समेत उनले चेतावनी दिए ।