काठमाडौं । बलिउड अभिनेता सैफ अली खानमाथि आक्रमणको आरोपमा एक व्यक्तिलाई पक्राउ गरिएको छ । छत्तीसगढस्थित दुर्ग जिल्लाको आरपीएफ अर्थात् रेलवे पुलिस फोर्सले एक रेलबाट उनलाई हिरासतमा लिएको हो ।

मुम्बईबाट हावडा जाँदै गरेको ज्ञानेश्वरी एक्सप्रेसबाट आकाश कन्नौजिया नामका युवकलाई पक्राउ गरिएको प्रहरीले जनाएको छ ।

सैफ अली खानमाथि आक्रमण गर्ने संदिग्ध व्यक्तिको तस्बिर । 

आरपीएफका एक अधिकारीले भने, “हामीले सेल फोन लोकेसनका आधारमा यी युवकलाई समातेका छौँ । उनीसँग सोधपुछ भइरहेको छ । मुम्बई पुलिसलाई पनि यसबारेमा सूचना दिइएको छ । त्यहाँबाट एउटा टोली पनि आउँदै छ ।”

यही जनवरी १५ को राति सैफमाथि आक्रमण भएको थियो । मुम्बईको बान्द्रास्थित उनको घरमा प्रवेश गरी अज्ञात व्यक्तिले सैफमाथि चक्कु प्रहार गरेको थियो । त्यसपछि उनलाई लीलावती अस्पतालमा भर्ना गरिएको बीबीसी हिन्दीले जनाएको छ ।

चिकित्सकले सैफको मेरुदण्डबाट साढे दुई इन्च लामो चक्कु निकालिएको बताएका छन् । शुक्रबार दिउँसो चिकित्सकले सैफ हिँडिरहेको तर उनलाई पूर्ण आराम गर्न सल्लाह दिइएको सञ्चारमाध्यमलाई बताएका थिए ।