काठमाडौं । बलिउड अभिनेता सैफ अली खानमाथि छुरा प्रहार भएको एक दिन बितिसक्दा पनि मुम्बई प्रहरीले आक्रमणकारीलाई पक्राउ गर्न सकेको छैन ।

सैफ अली खानलाई बिहीबार बिहान बान्द्रास्थित उनको निवासमा एक अज्ञात व्यक्तिले छुरा प्रहार गरेपछि अस्पताल भर्ना गरिएको छ । मुम्बईको बान्द्रा पुलिस स्टेसनमा आक्रमणकारीविरुद्ध मुद्दा दर्ता गरिएको छ ।

आक्रमणबाट ६ ठाउँमा चोट लागेको छ । उनको मेरुदण्ड र घाँटीमा गहिरो चोट लागेको छ ।

डाक्टरहरूले सैफ अली खानको मेरुदण्डबाट साढे दुई इन्च लामो चक्कु निकालिएको बताएका छन् । शुक्रबार दिउँसो डाक्टरहरूले सैफ अहिले हिँडिरहेको तर उनलाई पूर्ण आराम गर्न सल्लाह दिइएको सञ्चारमाध्यमलाई बताएका बीबीसीले जनाएको छ । 

जोइन्ट कमिस्नर सत्यनारायण चौधरीका अनुसार मुम्बई प्रहरीले आक्रमणकारीलाई पक्राउ गर्न २० वटा टोली गठन गरेको छ ।

सैफमाथि बुधबार मध्यराति करिब साढे २ बजे आक्रमण भएको थियो । त्यसपछि उनलाई लीलावती अस्पतालमा भर्ना गरिएको छ । बिहीबार विज्ञप्ति जारी गर्दै शल्यक्रियापछि सैफ खतरामुक्त रहेको बताएको छ ।

“यो घटना राति १ : ३० देखि २ : ३० को बीचमा भएको थियो । एक आरोपीको पहिचान भइसकेको छ । कुनै पनि हतियार जफत गरिएको छैन,” डेपुटी कमिस्नर अफ पुलिस दीक्षित गेडामले बीबीसी मराठीसँग भने, “करिब २५ देखि ३० वटा सीसीटीभी फुटेजको परीक्षण भइरहेको छ । सैफका घरेलु सहयोगीले बयान दिएका छन् । उनको उजुरीका आधारमा मुद्दा दर्ता गरिएको छ ।” 

उनले अभियुक्त आगोबाट उम्किने भर्‍याङबाट घर पुगेको जानकारी दिए ।  घरको ढोका कसरी खुल्यो र आक्रमणकारी कसरी भित्र पस्यो भन्नेबारे अनुसन्धान जारी छ । प्रारम्भिक अनुमानअनुसार अभियुक्तहरू चोरी गर्ने उद्देश्यले घरभित्र पसेका थिए ।

प्रहरीले भवनको सीसीटीभी फुटेजको परीक्षण गरिरहेको छ । सोसल मिडियामा एउटा फुटेज भाइरल भइरहेको छ, जसलाई सैफको भवनको रूपमा वर्णन गरिएको छ । यसमा एक व्यक्तिले खैरो कलरको टी–सर्ट लगाएको देख्न सकिन्छ । ती पुरुषले स्कार्फ पनि लगाएका छन् र सिँढीबाट तल ओर्लिरहेका छन् ।

हिन्दुस्तान टाइम्सको रिपोर्टअनुसार सैफ अली खानका अलावा उनको घरमा रहेका ५६ वर्षीया नर्स इलियामा फिलिप्स पनि घाइते भएकी छिन् । उनले नै मुद्दामा दर्ता गराएकी छन् । बीबीसी