काठमाडौं । चीनको बेइजिङस्थित नेपाली दूतावासले सिल्क रोड सिटी एलायन्ससँगको सहकार्यमा शुक्रबार ‘नेपाल टी टेस्टिङ’ महोत्सवको आयोजना गरेको छ ।

नेपाल–चीन सांस्कृतिक सम्बन्धलाई सुदृढ बनाउने उदेश्यले महोत्सव चाइना इन्टरनेसनल फ्युचर्स भवनमा आयोजना गरिएको थियो ।

“यो कार्यक्रमको उद्देश्य नेपाली चियाको प्रवर्द्धन गर्नु र नेपाली र चिनियाँ चिया व्यापारी र व्यवसायीहरूबीच नेटवर्क विकास गर्नु हो,” बेइजिङस्थित नेपाली दूतावासले शुक्रबार जारी गरेको विज्ञप्तिमा भनिएको छ ।

चीनका लागि नेपालका राजदूत डा. कृष्णप्रसाद ओलीले नेपाल र चीनमा चिया संस्कृति र यसको विशिष्टता र विशेषतालाई ध्यानमा राख्दै चीनमा नेपाली चियाको ठूलो व्यावसायिक सफलताको सम्भावना रहेको बताए ।

उनले उद्यमीहरूलाई चीनमा नेपाली चिया प्रवर्द्धन गर्न, नेटवर्क निर्माण गर्न र बजार रणनीतिहरू विकास गर्न आग्रह गरेका थिए ।

महोत्सवमा कालो, सेतो, सुनौलो, हरियो आदि विभिन्न प्रकारका अर्थोडक्स नेपाली चियाहरू प्रदर्शन गरिएको थियो । सहभागीहरूलाई प्रदर्शनमा राखिएका नेपाली चियाको स्वाद लिने अवसर प्रदान गरिएको थियो ।

कार्यक्रममा नेपाली दूतावासले नेपालबाट चिया आयात गर्ने चिनियाँ कम्पनीहरूलाई सम्मान गरेको थियो ।