काठमाडौं । देशका केही स्थानमा सोमबार (भोलि) र मंगलबार (पर्सि) वर्षा र हिमपातको सम्भावना छ । सातै प्रदेशका केही स्थानमा वर्षाको सम्भावना देखिएको मौसम पूर्वानुमान महाशाखाले जनाएको छ ।

बदली (आकाशमा बादल) भने आज (आइतबार) पनि हुनेछ । काठमाडौंसहितका स्थानमा आंशिकदेखि साधारणतथा बदली हुने महाशाखाका मौसमविद् बिनु महर्जनले जानकारी दिइन् । “बादल त आज पनि लाग्नेछ । केही समय खुलेको जस्तो भए पनि बादल लाग्ने देखिन्छ,” उनले बाह्रखरीसित भनिन्, “आज वर्षाको सम्भावना भने देखिएको छैन ।”

वर्षाको सम्भावना सोमबार रातिदेखि बढ्ने उनले बताइन् । सोमबारदेखि मंगलबार रातिसम्म केही स्थानमा वर्षा र हिमपातको सम्भावना रहेको उनले जानकारी दिइन् ।

उनका अनुसार, पश्चिमी न्यूनचापीय प्रणालीको प्रभावले सोमबार देशैभरि बदली हुनेछ । “सोमबार राति वाग्मती, गण्डकी, कर्णाली र सुदूरपश्चिम प्रदेशका एक/दुई स्थानमा हल्का वर्षाको सम्भावना छ,” उनले भनिन्, “कर्णाली र सुदूरपश्चिम प्रदेशका थोरै स्थानमा हिमपातको सम्भावना छ ।”

मंगलबार कोसी, मधेस, वाग्मती र गण्डकी प्रदेशका थोरै स्थानमा वर्षाको सम्भावना रहेको उनले बताइन् । त्यस दिन बाँकी प्रदेशका पनि एक/दुई स्थानमा वर्षा हुन सक्नेछ ।

“हिमपातको सम्भावनाचाहिँ सोमबार कर्णाली र सुदूरपश्चिम प्रदेशका हिमाली र उच्च पहाडी भूभागमा बढी र मंगलबार त्यसयताको भूभागको हिमाली क्षेत्रमा बढी देखिन्छ,” उनले भनिन् ।

आउँदो मंगलबार काठमाडौंमा पनि वर्षाको सम्भावना छ । हल्का वर्षा हुन सक्ने उनले बताइन् । “मंगलबार दिउँसो काठमाडौंमा पनि वर्षाको सम्भावना छ । ठूलो वर्षा होइन, हल्का वर्षाको सम्भावना देखिन्छ,” उनले भनिन्, “दुईवटा मोडेलले वर्षाको सम्भावना देखाएको छ । काठमाडौंमा वर्षाको सम्भावना ४० प्रतिशत हाराहारी देखिन्छ ।”

वर्षा र हिमपातको सम्भावना भनिए पनि त्यो ठूलो र धेरै हुने खालको नरहेको उनले स्पष्ट पारिन् । बुधबार पनि सामान्य बादल लाग्न सक्ने उनको भनाइ छ ।

अरू केही मौसमविद्ले पनि सोमबार रातिदेखि मंगलबारसम्म वर्षाको सम्भावना औँल्याएका छन् ।

उक्त दिन पानी परे यो वर्षको हिउँदको चौथो वर्षा हुनेछ । यही पुस १२ र १३ गते यो वर्षको हिउँदको तेस्रो वर्षा भएको थियो ।