काठमाडौं । देशका केही स्थानमा शुक्रबार र शनिबार वर्षा भएको छ । उच्च पहाडी र हिमाली कतिपय स्थानमा हिमपात पनि भएको छ । बदली (आकाशमा बादल) भने देशभर भएको मौसम पूर्वानुमान महाशाखाले जनाएको छ ।

यो वर्षको हिउँदको तेस्रो वर्षा पनि पश्चिम नेपालमै सीमितजस्तो देखिएको छ । अरू भूभागको तुलनामा सुदूरपश्चिम र कर्णाली प्रदेशमा वर्षा र हिमपात धेरै भएको महाशाखाका मौसमविद् सञ्जीव अधिकारीले जानकारी दिए ।

सुदूरपश्चिम र कर्णालीका केही र लुम्बिनी प्रदेशका एक/दुई स्थानमा अहिले पनि वर्षा भइरहेको उनले बताए । यीबाहेक अरू एक/दुई स्थानमा छिटपुट पानी परेको उनको भनाइ छ ।

“राति पनि सुदूरपश्चिम र कर्णाली प्रदेशका धेरै स्थानमा वर्षा र हिमपातको सम्भावना छ,” उनले बाह्रखरीसित भने, “बादल भने देशभर छ, चिसो बढेको छ ।”

पश्चिमी न्यूनचापीय प्रणालीका कारण बदली, वर्षा र हिमपात भएको हो । हल्का वर्षा र मध्यमसम्म हिमपात भएको उनले जानकारी दिए ।

महाशाखाले काठमाडौंमा पनि वर्षाको पूर्वानुमान गरेको थियो । अरू केही मौसमविद्ले समेत काठमाडौंमा वर्षाको सम्भावना औँल्याएका थिए । तर, शनिबार बेलुका करिब सवा ६ बजेसम्म यहाँ पानी परेको छैन । “काठमाडौं आसपास हाम्रा स्टेसनहरूमा वर्षा रेकर्ड भएको देखिएको छैन,” उनले भने ।

शनिबार दिउँसो काठमाडौंका एक/दुई स्थानमा आफूहरूले पानी पर्ने पूर्वानुमान गरेको उनले बताए । “हाम्रै र विभिन्न मोडलहरूले पानी पर्ने देखाएको थियो,” मौसमविद् अधिकारीले भने, “धेरै त होइन, एक/दुई स्थानमा हल्का वर्षाको पूर्वानुमान थियो ।”

काठमाडौंमा पानी पर्लापर्लाजस्तो भएको तर नपरेको उनले स्पष्ट पारे । पानी पर्न सक्ने सम्भावना राति पनि रहेको उनले बताए । “मोडलहरूले (शनिबार) दिउँसो पनि पानी पर्ने देखाएको हो, राति पनि केही सम्भावना देखिन्छ,” उनले भने ।

काठमाडौंमा पानी नपर्नुमा कुनै खास कारण नरहेको उनले उल्लेख गरे । पूर्वानुमान शतप्रतिशत नमिल्ने उनले बताए । “यो अस्वाभाविक कुरा होइन,” उनले भने, “पूर्वानुमान भनेको शतप्रतिशत मिल्दैन । पानी पर्नपर्न आँटेर नपरेको अवस्था हो ।”

आइतबार (भोलि) बिहानदेखि मौसम क्रमिक रूपमा खुल्दै जाने उनले जानकारी दिए ।

यो वर्षको हिउँदको दोस्रो वर्षा पुस ८ र ९ गते भएको थियो । त्यति बेला काठमाडौंमा छिटपुटसहित पश्चिम नेपालमा हल्कादेखि मध्यमसम्म वर्षा भएको थियो ।

गएको मंसिर २३ र २४ गते देशका केही स्थानमा यो वर्षको हिउँदको पहिलो वर्षा भएको थियो । त्यति बेला काठमाडौंमा छिटपुटसहित पश्चिम नेपालमा हल्कादेखि मध्यमसम्म वर्षा भएको थियो ।