काठमाडौं । प्रहरीले चालु आर्थिक वर्षको मंसिर मसान्त (६ महिना) सम्म मुलुकका विभिन्न क्षेत्रमा लगाइएको पाँच हजार ८१५ रोपनी क्षेत्रफलको गाँजाखेती नष्ट गरेको छ । 

नेपाल प्रहरीका केन्द्रीय प्रवक्ता, प्रहरी वरिष्ठ उपरीक्षक विश्व अधिकारीका अनुसार, सबैभन्दा बढी वाग्मती प्रदेशमा दुई हजार ९३७ रोपनी क्षेत्रफलमा गाँजाखेती नष्ट गरिएको छ ।

कोसी प्रदेशमा एक हजार ८१४ रोपनीमा, काठमाडौं उपत्यकामा १२०, गण्डकी प्रदेशमा ३४५, लुम्बिनी प्रदेशमा १६९ रोपनी क्षेत्रफलमा गाँजाखेती नष्ट गरिएको छ ।

त्यसैगरी, मधेस प्रदेशमा २५३, कर्णाली प्रदेशमा पाँच रोपनी र सुदूरपश्चिम प्रदेशमा १७२ रोपनीमा लगाइएको गाँजाखेती नष्ट गरिएको प्रवक्ता अधिकारीले जानकारी दिए । रासस