काठमाडौं । नेपालगन्ज रंगशालामा पुस १२ र १३ गते दोस्रो प्रोफेसनल हाप्किडो राष्ट्रिय प्रतियोगिता सम्पन्न भएको छ । प्रतियोगितामा लुम्बिनी प्रदेश १७ स्वर्ण, १३ रजत, र सात कांस्य पदकसहित टिम च्याम्पियन बनेको छ ।

यसैगरी सुदूरपश्चिम प्रदेशले ११ स्वर्ण, ९ रजत, र आठ कांस्य पदक जित्दै दोस्रो स्थान हासिल गरेको छ । कोसी प्रदेशले ६ स्वर्ण, सात रजत, र सात कांस्य पदकसहित तेस्रो स्थान प्राप्त गरेको छ ।

प्रतियोगितामा उत्कृष्ट खेलाडी पुरुषतर्फ सुदूरपश्चिम प्रदेशका नविनबहादुर धामी र महिलातर्फ लुम्बिनी प्रदेशकी विनिता केसी घोषित भइन् । उत्कृष्ट प्रशिक्षकमा पुरुषतर्फ सुदूरपश्चिम प्रदेशका वीरबहादुर सारुमगर र महिलातर्फ लुम्बिनी प्रदेशकी एलिशा खड्का घोषित भइन् ।

उदीयमान खेलाडीको रूपमा पुरुषतर्फ मधेस प्रदेशका राजकुमार महतोले प्राप्त गरे भने महिला तर्फ कर्णालीकी नविना भण्डारी भइन् । उत्कृष्ट रेफ्रीको उपाधि गण्डकी प्रदेशका पुरुषतर्फ समिर गुरुङ र महिलातर्फ लुम्बिनी प्रदेशकी निक्कु विश्वकर्माले प्राप्त गरिन् । अनुशासित खेलाडी पुरुषतर्फ वाग्मती प्रदेशका प्रसन्न आचार्य र महिलातर्फ सुदूरपश्चिम प्रदेशकी बिमला थापामगर भइन् ।

सेल्फ डिफेन्स, डेमोस्ट्रेसन तर्फ प्रथम स्थान लुम्बिनी प्रदेश, दोस्रो स्थान कोसी प्रदेश र तेस्रो स्थान वाग्मती प्रदेशले प्राप्त गरे । प्रतियोगिता नेपाल हाप्किडो संघको आयोजनामा भएको थियो । वार्षिक कार्यक्रमअनुसार ६ वटा राष्ट्रिय प्रतियोगिता आयोजना गर्दै आएको संघले जनाएको छ ।