काठमाडौं । नेपाल कम्युनिष्ट पार्टी (नेकपा)का महासचिव नेत्रविक्रम चन्द ‘विप्लव’ले माओवादी फुट्ने क्रम नरोकिने बताएका छन् । बिहीबार माओ दिवसको अवसरमा काठमाडौंमा आयोजित एक कार्यक्रममा बोल्दै चन्दले यस्तो बताएका हुन् ।

उनले माओवादी फुटेर साउने भेलजस्तो भएको उल्लेख गर्दै माओवादी नभएको कुनै ठाउँ नरहेको जिकिर गरे । माओवादी फुटेर १९ वटा भइसकेको उनको भनाइ छ । उनले माओवादी नेताहरूको मन शान्त र दिमाग स्थिर नभएको टिप्पणी गर्दै माओवादीहरूले मुलुकमा तरंग ल्याउने गरेको बताए ।

उनले भने, "माओवादी लड्दालड्दै धेरै बढे पनि अटाएन । छल्कियो, यताउता पोखियो भने पनि हुन्छ । साउनको भेलजस्तो कुलातिर पनि पस्या छ, झारीतिर पनि पस्या छ । बाटोमा पनि हिँड्या छ । कहाँ पुगेन माओवादी आज ? सबैतिर छ । माओवादी नभएको ठाउँ देख्नुहुन्न । फुट्न पनि हामी जति को फ्ट्या होला र ? एउटा साथीले डायरीमा लेख्नुभएछ । माओवादी १९ वटा पुगेछ । अर्को पनि थप्नुस् । २० हुन्छ । फुटेर कहाँ पुग्ने हो निश्चित छैन । फुट्दाफुट्दै जब यो सकिन्छ नि त्यसपछि सायद केन्द्रित पनि हुन्छ होला । कति फुट्यो ? सकियो कि सकिएन ? हिसाब हुँदैछ । यो साँचो कुरा हो । माओवादीका सबै घटकहरूमा यो बहसहरू चलिरहन्छन् नि त । विभिन्न तरंगहरू छन् किनभने माओवादीको मन शान्त छैन । मन शान्त नभएर दिमाग स्थिर छैन । समाजमा हाम्रो बारेमा अनकौँ खालका तर्कहरू छन् । माओवादीहरू शान्त भएर बस्ने मान्छेहरू पनि होइनौँ नि त ।"

उनले माओवादी फुट्ने क्रम जारी रहेको उल्लेख गर्दै यो क्रम सकिएसँगै केन्द्रीकृत हुँदै जाने दाबी गरे ।