विराटनगर । न्युरोड टिम (एनआरटी) झापा कपको फाइनलमा प्रवेश गरेको छ । झापाको बिर्तामोडमा जारी प्रतियोगिताअन्तर्गत शनिबार इटहरीको राष्ट्रिय जागृति क्लबलाई ‘टाइब्रेकर’मा ३–० ले हराउँदै एनआरटीले फाइनलमा स्थान सुरक्षित गरेको हो । एनआरटीले अब फाइनलमा चर्च ब्वाइज युनाइटेड क्लबको सामना गर्नेछ ।

खेलको निर्धारित ९० मिनेटमा गोलरहित बराबरी भएको थियो । त्यसपछि टाइब्रेकरमा एनआरटी सफल भयो ।

पेनाल्टी सुटआउटमा एनआरटीका एञ्जल महर्जन, कृतिश छुञ्जु र अभिषेक लिम्बूले गोल गरे । जागृतिका कप्तान प्रवेश दनुवार र सविन घिमिरेको प्रहार गोलरक्षक विशाल सुनारले विफल बनाएका थिए । विदेशी खेलाडी एलेक्सको प्रहार बारमा लागेर बाहिरिएको थियो ।

घम्साघम्सीपूर्ण खेलमा रेफ्री प्रज्ज्वल महर्जनले आठवटा पहेँलो कार्ड देखाएका थिए । जागृतिका चार र एनआरटीका चार खेलाडीले पहेँलो कार्ड पाएका हुन् ।

खेलको ‘प्लेयर अफ दी म्याच’ एनआरटीका गोलरक्षक सुनार घोषित भए । उनले १० हजार रुपैयाँ पुरस्कार पाए ।

प्रतियोगितामा नेपाल र भारतका १० टिमको सहभागिता थियो । विजेताले १० लाख तथा उपविजेताले पाँच लाख रुपैयाँ पुरस्कार पाउने आयोजक झापा–११ फुटबल क्लबका अध्यक्ष जलकुमार गुरुङले जानकारी दिए । प्रतियोगिताको फाइनल खेल पुस ८ गते हुनेछ ।