काठमाडौं । नेपाल प्रिमियर लिग (एनपीएल)मा पोखरा राइनोजविरुद्ध टस जितेर ब्याटिङमा उत्रिएको विराटनगर किंग्सले १० ओभरमा ६१ रन बनाएको छ । बिहीबार कीर्तिपुरस्थित त्रिवि क्रिकेट मैदानमा १० ओभर सकिँदा विराटनगरले तीन विकेट गुमाएर ६१ रन बनाएको हो ।

विराटनगरबाट हाल क्रिजमा रहेका स्कट एड्वार्ड्सले ११ र निकोलस किर्टोनले १३ रन बनाएका छन् ।

त्यसअघि, विराटनगरले ओपनरद्वय मार्टिन गप्टिल र लोकेश बमसँगै नरेन भट्टलाई गुमाएको थियो । लोकेश २६, गप्टिल पाँच र नरेन चार रनमा पभेलियन फर्किए ।

प्रतियोगिताको प्लेअफ सम्भावना कायम राख्न दुवै टिम जितको दबाबमा छन् । यी दुवै टिमले समान चार खेल खेल्दा एकमा मात्र जित निकालेका छन् ।

प्रतियोगिताको आफ्नो पहिलो खेलमा पोखराले चितवनसँग ८७ र दोस्रोमा जनकपुर बोल्ट्ससँग सात विकेटको हार व्यहोरेको थियो । पोखराले तेस्रो खेलमा लुम्बिनी लायन्सविरुद्ध १० विकेटको जित निकालेको थियो । पोखराले चौथो खेलमा कर्णाली याक्ससँग पुनः सात विकेटको हार व्यहोरेको थियो ।

विराटनगरले भने प्रतियोगिताको पहिलो र दोस्रो खेलमा क्रमशः जनकपुर र सुदूरपश्चिम रोयल्ससँग आठ विकेट र ९० रनको हार व्यहोरेको थियो । विराटनगरलले तेस्रो खेलमा लुम्बिनीविरुद्ध दुई विकेटको जित निकालेको थियो । विराटनगर चौथो खेलमा कर्णालीसँग सात रनले पराजित भएको थियो ।