काठमाडौं । नेपाल प्रिमियर लिग (एनपीएल)मा पहिलो हार व्यहोरेपछि जनकपुर बोल्ट्सका कप्तान अनिल साहले यो आगामी दिनका निम्ति शिक्षा भएको प्रतिक्रिया दिएका छन् । जनकपुरले बुधबारको पहिलो खेलमा सुदूरपश्चिम रोयल्ससँग ७२ रनको हार व्यहोरेको थियो ।

खेलमा सुदूरपश्चिमले दिएको १२४ रनको लक्ष्य पछ्याउने क्रममा जनकपुर ५१ रनमै समेटिएको थियो । खेलपछि पत्रकारसँगको कुराकानीमा अनिलले यो खेल आगामी दिनका लागि शिक्षा भएको प्रतिक्रिया दिएका हुन् । “जसरी प्रतियोगिता सुरु भएको थियो । त्यसरी जान सकिरहेको छैन । ब्याटरको रूपमा हामी सर्ट छनोट गर्न चुक्यौँ । पार्टनरसिप बन्न सकेन । सुरुदेखि हाम्रो टप अर्डर राम्रो भएको थियो । मध्यक्रमले खुल्ने मौका पाएका थिएनन् । तर, अस्तिको खेल र आजको खेलमा मध्यक्रम देखियो । हारले कमजोरीहरू देखायो, आगामी दिनका लागि यो शिक्षा हो,” अनिलले भने ।

आफ्नो प्रदर्शनबाट कत्तिको सन्तुष्ट हुुनुहुन्छ भन्ने प्रश्नमा अनिलले शून्यमा आउट हुँदा कुनै पनि ब्याटर सन्तुष्ट बन्न नसक्ने बताए । “शून्यमा आउट हुँदा पक्कै पनि कोही ब्याटर आफ्नो प्रदर्शनबाट पनि सन्तुष्ट हुँदैन । म पनि सन्तुष्ट छैन,” अनिलले थपे ।

प्रतियोगितामा पहिलो हार व्यहोरेको जनकपुर पाँच खेलबाट आठ अंकसहित तालिकाको दोस्रो स्थानमा छ । समान खेलबाट आठ अंक नै जोडेको सुदूरपश्चिम भने यो जितसँगै तालिकाको शीर्ष स्थानमा उक्लिएको छ ।