काठमाडौं । क्रान्तिकारी कम्युनिस्ट पार्टी नेपालको महासचिवमा मोहन वैद्य सर्वसम्मत चयन भएका छन् । यही मंसिर १३ देखि २३ गतेसम्म काठमाडौंमा भएको महाधिवेशनबाट वैद्यलाई महासचिवका रूपमा सर्वसम्मत चयन गरिएको हो ।

मंगलबार काठमाडौंमा पत्रकार सम्मेलन गरी पार्टीले महाधिवेशनबाट संगठनात्मक दृष्टिकोणले महासचिवीय प्रणालीमा जाने, पूर्ण केन्द्रीय समिति ११७ जनाको, ९५ जनाको वैकल्पिक केन्द्रीय सदस्य राख्ने, केन्द्रीय परिषद् समेत बनाउने निर्णय गरेको जनाइएको छ ।

पत्रकार सम्मेलनमा पार्टीका नेता सीपी गजुरेलले बेल्ड एन्ड रोड इनिसिएटिभ्स (बीआरआई) परियोजनाअन्तर्गत सहायता मात्र लिने भनेर नेपाली कांग्रेसले राष्ट्रवादी, देशभक्त देखिन खोजेको आरोप लगाए । बीआरआईबाट नेपालले भविष्यमा धेरै आर्थिक फाइदा लिन सक्ने भएकाले आफ्नो पार्टीले विरोध नगर्ने उनले उल्लेख गरे ।

“अहिले कांग्रेसले बडो राष्ट्रवादी, देशभक्त देखिनको लागि के गरिरहेको छ भने यो बीआरआई बनाउन दिने, तर के गर्ने भने ऋणमा होइन, सहायतामा दिनुपर्छ भनेर सर्त राखिदिएको छ । नाफा कमाउनका निम्ति चीनले त्यो गरिरहेको छ,” उनले भने ।

उनले थपे, “यतातिर कांग्रेसले ऋण लिने कुरा हुँदैन, पूरै सहायतामा बनाउनुपर्छ भनिरहेको छ । त्यसमा विवाद निस्किएको छ । त्यो त चीन र नेपालले टुंग्याउने कुरा हो । हामीले यो हुनुपर्छ भन्ने कुरा भएन ।”

पार्टीले राष्ट्रियता, जनतन्त्र तथा जनजीविकाका समस्यालाई लिई स्वतन्त्र पहल र कार्यगत एकता एवं संयुक्त मोर्चा गरी संघर्षका कामलाई अगाडि बढाउँदै लैजाने निर्णय गरेको छ । न्युज एजेन्सी नेपाल