काठमाडौं । आन्द्रियस गौस र दीनेश खरेलको कीर्तिमानी साझेदारीप्रेरित पोखरा एभेन्जर्सले नेपाल प्रिमियर लिग (एनपीएल)मा लुम्बिनी लायन्सविरुद्ध १० विकेटको शानदार जित निकालेको छ ।

जारी प्रतियोगितामा पोखराको तेस्रो खेलमा यो पहिलो जित हो । पोखरा यसअघि पहिलो खेलमा चितवन राइनोजसँग ८७ रनले र दोस्रो खेलमा जनकपुर बोल्ट्ससँग सात विकेटले पराजित भएको थियो ।

शुक्रबार कीर्तिपुरस्थित त्रिवि क्रिकेट मैदानमा गौसले शतक र दीनेशले अर्धशतक बनाएपछि लुम्बिनीले प्रस्तुत गरेको १७१ रनको लक्ष्य पोखराले १६.५ ओभरमा विकेट नगुमाई भेट्टायो ।

शुक्रबार कीर्तिपुरस्थित त्रिवि क्रिकेट मैदानमा गौसले शतक र दीनेशले अर्धशतक बनाएपछि लुम्बिनीले प्रस्तुत गरेको १७१ रनको लक्ष्य पोखराले १६.५ ओभरमा विकेट नगुमाई भेट्टायो । प्रतियोगितामा यो विकेट आधारको सबैभन्दा ठूलो जित हो ।

पोखराको जितमा ओपनर गौसले अविजित १०४ रन जोडे । गौसले ५५ बलमा १२ चौका र पाँच छक्का प्रहार गरे । योसँगै उनी एनपीएलमा शतक बनाउने पहिलो ब्याटर समेत बने । लुम्बिनीविरुद्ध गौसले २० बलमा अर्धशतक र ५४ बलमा शतक पूरा गरेका थिए ।

गौससँगै अविजित रहेका अर्का ओपनर दीनेश खरेलले ६१ रन बनाए । ४६ बल खेलेका दीनेशले समान चार चौका र छक्का प्रहार गरे ।

पोखराका ओपनर आन्द्रियस गौस र दीनेश खरेलले पहिलो विकेटका निम्ति १७६ रनको कीर्तिमानी साझेदारी बनाए । जारी प्रतियोगितामा यो हालसम्मको सबैभन्दा ठूलो साझेदारी हो । गौस र दीनेशले यसअघि जनकपुरका हर्ष थाकेर र लहिरु मिलान्थाको नाममा रहेको कीर्तिमान तोडेका हुन् । यसअघि थाकेर र मिलान्थाले विराटनगर किंग्सविरुद्ध ११६ रनको साझेदारी गर्दै यो कीर्तिमान बनाएका थिए । थाकेर र मिलान्थाले तेस्रो विकेटका निम्ति यो साझेदारी गरेका थिए ।

पोखराविरुद्ध प्रभावहीन बनेको लुम्बिनीका सबै बलर विकेटविहीन रहे । लुम्बिनीले सात बलर प्रयोग गरे पनि कसैले विकेट निकाल्न सकेनन् ।

पहिलो इनिङ : शतकबाट पाँच रनले चुकेको रोहित
त्यसअघि टस जितेर ब्याटिङमा आएको लुम्बिनीले निर्धारित २० ओभरमा पाँच विकेट गुमाएर १७० रनको योगफल खडा गरेको थियो ।

इनिङको अन्तिम बलमा रनआउट भएका लुम्बिनीका रोहितले ९५ रन बनाए । शतक बनाउन पाँच रनले चुकेका रोहितले उनले ५९ बलमा १० चौका र चार छक्का प्रहार गरे । प्रतियोगितामा रोहित अर्धशतक बनाउने १०औँ ब्याटर बने ।

४६–३ को कठिन स्थितिबाट रोहितले चौथो विकेटका निम्ति टम मोरिससँग ११० रनको शतकीय साझेदारी गर्दै लुम्बिनीको इनिङ सम्हालेका थिए । जारी प्रतियोगितामा चौथो विकेटका निम्ति बनेको यो सबैभन्दा ठूलो साझेदारी हो । यसअघि चितवनका कुशल मल्ल र रवि बोपाराले ६८ रनको साझेदारी गर्दै यो कीर्तिमान बनाएका थिए । कुशल र रविले पोखराविरुद्ध नै यो साझेदारी बनाएका थिए ।

मोरिसले ४५ रन बनाए । अर्धशतक बनाउन पाँच रनले चुकेका मोरिसले ३८ बलमा दुई चौका र दुई छक्का प्रहार गरे । मोरिसलाई १९औँ ओभरको अन्तिम बलमा आन्द्रियस गौसले रनआउट गरेका थिए ।

लुम्बिनीको खातामा सन्दीप जोराले १८ रन थपे । सातौँ ओभरको पहिलो बलमा म्याट क्रिट्च्लीबाट एलबीडब्लूको धरापमा पर्नुअघि सन्दीपले १५ बलमा दुई चौका र एक छक्का प्रहार गरे । विवेक यादव दुई रनमा अविजित रहे ।

त्यसअघि लुम्बिनीका दुवै ओपनर डक भएका थिए । ओपनर आशुतोष घिरैया पहिलो ओभरको तेस्रो बलमा विपिन खत्रीबाट एलबीडब्लू आउट भए । अर्का ओपनर उन्मुक्त चन्द पनि चार बल खेल्दै रन नजोडी पभेलियन फर्किए । उन्मुक्तलाई तेस्रो अ‍ोभरको दोस्रो बलमा विपिन खत्रीले रेमन रेफरबाट क्याच गराएका थिए ।

पोखराका विपिन खत्रीले दुई विकेट लिए । तीन ओभर बलिङ गरेका विपिनले १८ रन खर्चिए । म्याच क्रिट्च्लीको नाममा एक विकेट रह्यो ।

प्रतियोगितामा लुम्बिनीको भने यो लगातार दोस्रो हार हो । लुम्बिनी यसअघि पहिलो खेलमा विराटनगर किंग्ससँग दुई विकेटले पराजित भएको थियो ।

यसअघि आजै भएको पहिलो खेलमा कर्णाली याक्सले चितवन राइनोजविरुद्ध ६ विकेटको जित निकालेको थियो ।