काठमाडौं । नेपाल प्रिमियर लिग (एनपीएल)मा लुम्बिनी लायन्सविरुद्ध लक्ष्य पछ्याइरहेको पोखरा एभेन्जर्सबाट ओपनर आन्द्रियस गौसले आक्रामक अर्धशतक बनाएका छन् ।

कीर्तिपुरस्थित त्रिवि क्रिकेट मैदानमा जारी खेलमा लुम्बिनीले प्रस्तुत गरेको १७१ रनको लक्ष्य पछ्याइरहेको पोखराबाट गौसले २० बलमै ५० रन बनाए । यसक्रममा उनले समान चार चौका र छक्का प्रहार गरे । योसँगै गौस प्रतियोगितामा अर्धशतक बनाउने ११औँ ब्याटर बने ।

जारी खेलको सात ओभर सकिँदा पोखराले विकेट नगुमाई ९३ रन बनाएको छ । पोखराबाट हाल क्रिजमा गौससँगै रहेका दीनेश खरेलले ३२ रन बनाएको छन् ।

त्यसअघि टस जितेर ब्याटिङमा आएको लुम्बिनीले निर्धारित २० ओभरमा पाँच विकेट गुमाएर १७० रनको योगफल खडा गरेको थियो ।

लुम्बिनी र पोखरा आज पहिलो जितको खोजीमा छन् । लुम्बिनी यसअघि पहिलो खेलमा विराटनगर किंग्ससँग दुई विकेटले पराजित भएको थियो । यता, पोखरा भने पहिलो खेलमा चितवन राइनोजसँग ८७ रनले र दोस्रो खेलमा जनकपुर बोल्ट्ससँग सात विकेटले पराजित भएको थियो ।