काठमाडौं । नेपाल प्रिमियर लिग (एनपीएल)मा चितवन राइनोजविरुद्ध लक्ष्य पछ्याइरहेको पोखरा एभेन्जर्सले पहिलो पावर प्लेमै शीर्ष क्रममा ६ विकेट गुमाएको छ । 

कीर्तिपुरस्थित त्रिवि क्रिकेट मैदानमा चितवनले दिएको १६२ रनको लक्ष्य पछ्याइहेको पोखराले ६ ओभरमा १६ रन बनाउँदा ६ विकेट गुमाएको हो । पहिलो ओभरमा कप्तान कुशल भुर्तेल, दीलिप नाथ र बास डे लिडेलाई गुमाएको हो । 

चितवनका सोहेल तान्विरले इनिङको पहिलो बलमै पोखराका कप्तान कुशललाई ‘रोयल डक’ गरे । यस्तै, चौथो बलमा चार रन बनाएका दीलिप र त्यसपछि ब्याटिङमा आएका बास डे लिडेलाई ‘गोल्डेन डक’ गरे । 

यसपछि चौथो ओभरमा रिजन ढकालले पनि तीन विकेट लिए । सो ओभरको पहिलो बलमा रिजनले दीनेश खरेल, चौथो बलमा किरण ठगुन्ना र अन्तिम बलमा माइकल लिस्कलाई आउट गरे । पोखराका दीनेश र किरणले समान एक रन बनाउँदा लियस्क ‘डक’ भए । 

पावर प्लेमा समान तीन ओभर गरेको तान्विर र रिजनले एक–एक मेडन फ्याके । त्यसअघि टस हारेर ब्याटिङमा आएको चितवनले निर्धारित २० ओभरमा सात विकेट गुमाएर १६१ रनको योगफल खडा गरेको थियो ।