सिड्नी । पछिल्लो समय अष्ट्रेलिया र न्युजिल्यान्डमा नेपाली फिल्महरू बक्स अफिस रिलिज हुने क्रम बढ्न थालेको छ । यसै क्रममा ‘तेल भिसा’ले पनि यहाँको बक्स अफिसमा स्थान पाएको हो । यसअघि यहाँ बक्स अफिस रिलिज गरिएको पहिलो चलचित्र प्रेम गीत थियो ।  

पछिल्लो शुक्रबारबाट प्रदर्शनमा आएको चलचित्र ‘तेल भिसा’ नेपालसँगै अष्ट्रेलिया र न्युजिल्यान्डका विभिन्न हलहरूमा बक्स अफिसमा रिलिज भएको हो  । तेल भिसालाई नमस्ते इन्टरटेनमेन्ट र रगडेल ब्वाइजले अष्ट्रेलिया भित्र्याएका हुन् ।

विदेशिएका सन्तानको निमन्त्रणामा विदेश गएका आमा बुबाले विदेश बस्दा भोग्नुपर्ने समस्या र पीडाका बारेमा फिल्ममा देखाइएको बताइएको छ । यसकारण पनि यो फिल्मले विदेशमा राम्रो बजार पाएको आयोजक रकडेल ब्वाइजका शीतल गिरीले बताए । नमस्ते इन्टरटेन्मेन्टका देव कार्कीका अनुसार फिल्म तेल भिसाले अष्ट्रेलिया र न्युजिल्यान्डका ४० वटा हलहरूमा एकसयभन्दा बढी स्क्रिनहरू पाएको छ ।