काठमाडौं । स्थानीय तहमा रिक्त ४१ पदमा जनप्रतिनिधि चयनका निम्ति आइतबार (भोलि) मतदान हुँदै छ । काठमाडौंको कीर्तिपुर नगरपालिकालगायत स्थानमा उपनिर्वाचनअन्तर्गत मतदान हुन लागेको हो ।

उपनिर्वाचन हुने स्थानमा बिहान ७ः०० देखि बेलुका ५ः०० बजेसम्म मतदान गर्ने व्यवस्था मिलाइएको निर्वाचन आयोगले जनाएको छ । निर्धक्क भई मतदान गर्न सम्बन्धित सबै मतदातालाई आयोगले आग्रह गरेको छ ।

आयोगले मतदान कसरी गर्ने भन्ने बारेमा जानकारी पनि गराएको छ । आफूलाई प्राप्त मतपत्र लिई गोप्य मतदान कक्षमा गएर मन परेको कुनै एक उमेदवारको निर्वाचन चिह्न भएको कोठामा स्वस्तिक छापले मत संकेत गर्नुपर्छ । त्यसपछि मतपत्रलाई राम्ररी पट्याएर मतपेटिकामा खसाल्न आयोगले आग्रह गरेको छ ।

आयोगले मत बदर हुने अवस्थाबारे पनि जानकारी गराएको छ । मतपत्र च्यातिएमा, मतपत्रमा मतदान अधिकृतको हस्ताक्षर नभएमा, मतपत्रमा स्वस्तिक छाप नबुझिने गरी लतपतिएमा मत बदर हुन्छ ।

यस्तै, दुईवटा निर्वाचन चिह्न रहेको कोठाको बीचमा पर्ने गरी मत संकेत गरेमा, निर्वाचन चिह्न रहेको कोठाभन्दा बाहिर मत संकेत गरेमा, मतपत्रमा स्वस्तिक छापबाहेक औँठाछाप, हस्ताक्षर आदिले मत संकेत गरेमा पनि मत बदर हुने आयोगले जनाएको छ ।

• निर्धक्क भई मतदान गर्नोस् : आयोग
• स्थानीय तह उपनिर्वाचन : मतदाता परिचयपत्र नभए के गर्ने ?
• स्थानीय तह उपनिर्वाचन : मतदानका दिन के गर्न हुँदैन ?