काठमाडौं । निर्वाचन आयोगले उपनिर्वाचन हुने स्थानका सबै मतदान केन्द्रलाई अतिसंवेदनशील मानेर सुरक्षा व्यवस्था मिलाउन आग्रह गरेको छ । मंसिर १६ गते हुन लागेको उपनिर्वाचनमा पर्याप्त सुरक्षा व्यवस्था मिलाउन आग्रह गरिएको प्रमुख निर्वाचन आयुक्त दिनेशकुमार थपलियाले जानकारी दिए ।

“हामीले सबैलाई अतिसंवेदनशील भन्नु भनेका छौँ । सुरक्षा निकाय र सुरक्षाकर्मी प्रयाप्त छन् । सबैलाई अतिसंवेदनशील ठानेर आवश्यक सुरक्षा व्यवस्था गर्न आग्रह गरेका छौँ,” उनले बाह्रखरीसँग भने ।

उनले सुरक्षाकर्मीको संख्या निर्धारणका लागि मतदान केन्द्र अतिसंवेदनशील, संवेदनशील र सामान्यमा छुटाउने गरिन्छ ।

“अतिसंवेदनशील, संवेदनशील र सामान्य भनेको सुरक्षाकर्मीको संख्या किटान गर्नका लागि हो । अहिले सुरक्षाकर्मी पर्याप्त दिन सकिन्छ भने अतिसंवेदनशीलमा राखेर मतादन केन्द्रमा ९ जना खटाउने भन्ने हो,” थपलियाले भने ।

मंसिर १६ गते ३३ जिल्लाका ४४ पदका लागि उपनिर्वाचन हुन लागेको हो । जसका लागि १६२ मतदान स्थल र २९३ मतदान केन्द्र कायम गरिएका छन् ।

उपनिर्वाचन हुन लागेका तीन पदमा एकल उमेदवारी परेकोले सर्वसम्मत भइसकेको छ । ओखलढुंगा जिल्ला समन्वय समिति प्रमुखमा कांग्रेसका टेकराज भट्टराई र कैलाली जिल्ला समन्वय समिति प्रमुखमा कांग्रेसकै टीकाकुमारी चौधरी (भुल) निर्विरोध निर्वाचित भइसकेका छन् ।

रुकुम पूर्वको पुथा उत्तरगंगा गाउँपालिका–२ को वडाध्यक्षमा माओवादीका जगत घर्ती निर्विरोध निर्वाचित भएका छन् । त्यसैले ४१ पदका लागि मात्रै मतदान हुने छ ।

उपनिर्वाचनमा दुई लाख २६ हजार ७९९ मतदाता छन् ।