काठमाडौं । नेपाल धितोपत्र बोर्डको अध्यक्षमा सन्तोषनारायण श्रेष्ठ नियुक्त भएका छन् । सोमबार बसेको मन्त्रिपरिषद् बैठकले श्रेष्ठलाई बोर्डको अध्यक्ष नियुक्त गरेको स्रोतले जनाएको छ ।

यसअघि, आइतबार सिफारिस समितिले श्रेष्ठसहित डा. नवराज अधिकारी र मुक्तिनाथ श्रेष्ठको नाम सिफारिस गरेको थियो । उनीहरूमध्येबाट मन्त्रिपरिषद्ले सन्तोषनारायणलाई नियुक्त गरेको हो ।

बोर्डको अध्यक्षका लागि आवेदन दिएकामध्ये पाँचजना सर्टलिस्टमा परेका थिए । उनीहरूमध्ये सन्तोषनारायण र मुक्तिको गत असार २ गते नै अन्तर्वार्ता र प्रस्तुतीकरण भएको थियो ।

बाँकी रहेका डा. अधिकारी, कृष्णबहादुर कार्की र चिरञ्जीवी चापागाईंलाई सिफारिस समितिले आइतबार अन्तर्वार्ता र प्रस्तुतीकरणका लागि बोलाएको थियो । तर, नेपाल बिमा प्राधिकरण (तत्कालीन बिमा समिति)का अध्यक्ष चापागाईं सहभागी भएनन् ।

आइतबार अन्तर्वार्ता र प्रस्तुतीकरणमा सहभागीमध्ये नेपाल स्टक एक्सचेन्ज (नेप्से)का प्रमुख कार्यकारी अधिकृत कार्कीको नाम भने सिफारिसमा परेन ।

को हुन् सन्तोषनारायण श्रेष्ठ ?

वित्तीय क्षेत्रमा दखल राख्ने श्रेष्ठले काठमाडौं विश्व विद्यालयबाट सन् २००३ मा स्नातकोत्तर गरेका हुन् । उनीसँग दुई दशक लामो पेसागत ताथ व्यावसायिक अनुभव छ । उनले स्वाभिमान लघुवित्त वित्तीय संस्था (तिलोत्तमा)को अध्यक्ष भएर (२०१७–२०२४) काम गरे । 

उनी नेपाल विद्युत् प्राधिकरणको सदस्य (२०१३–१६) पनि रहिसकेका छन् । यस्तै, नेपाल एक्सप्रेस फाइनान्सको सदस्य (२००५–२०१५) पनि रहे ।

उनीसँग नारायण सोप एन्ड केमिकल्सको प्रबन्ध निर्देशक, जियोसन नेपाल इन्जिनियरिङ एन्ड सोलुसन्सको कार्यकारी निर्देशकका साथै विभिन्न राष्ट्रिय एवं अन्तर्राष्ट्रिय संघसंस्थासँग काम गरेको अनुभव छ ।

उनले सरकारबाट प्रदान गरिएको नयाँ जिम्मेवारीलाई आगामी दिनमा आफ्नो कामबाटै प्रमाणित गर्ने प्रतिक्रिया दिएका छन् । नेपालको पुँजीबजारलाई साँच्चिकै लगानी जुटाउने स्रोतको रूपमा विकास गर्ने उनको योजना छन् । उनले पुँजीबजारबाट मुलुकको विकास र समृद्धिमा योगदान गर्ने बताएका छन् ।