केरला । भारतको केरलको वायनाड लोकसभा सिटमा भएको उपनिर्वाचनमा भारतीय कांग्रेसका उमेदवार प्रियंका गान्धी वाड्राले तीन लाखभन्दा बढी मतान्तरले अग्रता कायम गरेकी छन् ।

गान्धीले चार लाख ६१ हजार ५६६ मत प्राप्त गरेकी छन् । उनका निकटतम् प्रतिद्वन्द्वी भारतीय कम्युनिस्ट पार्टी (भाकपा)का सत्यन मोकरीले एक लाख ५६ हजार ५६६ मत प्राप्त गरेका छन् । भारतीय जनता पार्टी (भाजपा)का नाव्या हरिदास ८४ हजार ४९९ मतसहित तेस्रो स्थानमा रहेकी छन् ।

महाराष्ट्र र झारखण्डको विधानसभा चुनावसँगै १४ राज्यका ४८ विधानसभा निर्वाचन क्षेत्र र लोकसभाका दुई सिटका निम्ति भएको उपनिर्वाचनको सम्पूर्ण परिणाम शनिबार नै आउने अपेक्षा गरिएको छ ।

लोकसभाका निम्ति कांग्रेस नेता राहुल गान्धी यसै वर्ष जुनमा भएको चुनावमा केरल राज्यको वायनाड र उत्तर प्रदेशको रायबरेलीबाट विजयी भएका थिए । त्यसपछि उनले वायनाडबाट राजीनामा दिएका थिए । गान्धीले वायनाडबाट तीन लाख ६४ हजारभन्दा बढी मतको अन्तरले विजय हासिल गरेका थिए । उनको स्थानमा प्रियंका गान्धी वायनाडबाट चुनावी प्रतिस्पर्धामा उत्रिएकी हुन् ।

वायनाडबाहेक महाराष्ट्रको नान्देड लोकसभा सिटमा पनि उपनिर्वाचन भएको छ । भाजपाका उमेदवार सन्तुकराव हाम्बार्डे दुई हजार ६०० भन्दा बढी मतान्तरले अगाडि छन् । दोस्रो स्थानमा कांग्रेस उमेदवार रवीन्द्र चव्हाण छन् । रासस/एएनआई