काठमाडौं । झापामा हत्या आरोपमा प्रहरीले एक व्यक्तिलाई पक्राउ गरेको छ । पक्राउ पर्नेमा बाह्रदशी गाउँपालिका–५, फूलबारीका २६ वर्षीय मानकुमार राजवंशी छन् ।

सोही ठाउँका ४५ वर्षीय गंगालाल माझीको हत्या गरेको उनीमाथि आरोप छ । शनिबार राति राजवंशीलाई पक्राउ गरिएको जिल्ला प्रहरी कार्यालय झापाका डीएसपी कृष्णकुमार चन्दले जानकारी दिए ।

प्रहरीका अनुसार, पुरानो रिसइबीका कारण उनीहरूबीच विवाद भएको थियो । त्यसक्रममा राजवंशीले फलामको रड प्रहार गर्दा छिमेकी माझी गम्भीर घाइते भएका थिए । उपचारका निम्ति माझीलाई बिर्तामोडस्थित बीएन्डसी अस्पतालमा लगिएको थियो । अस्पतालमा चिकित्सकले उनको मृत्यु भइसकेको घोषणा गरेका थिए ।

त्यसपछि खटिएको प्रहरी टोलीले राजवंशीलाई उक्त फलामको रडसहित नियन्त्रणमा लिएको डीएसपी चन्दले जानकारी दिए । उनलाई इलाका प्रहरी कार्यालय अनारमनीमा राखेर थप अनुसन्धान गरिँदै छ ।