बागलुङ दुर्घटना : मृतक पाँचजनाको पहिचान

देश

बागलुङ दुर्घटना : मृतक पाँचजनाको पहिचान

सोमबार, कात्तिक २६, २०८१

बागलुङ दुर्घटना : मृतक पाँचजनाको पहिचान — प्रतीकात्मक तस्बिर ।

बागलुङ । बागलुङको जैमिनी नगरपालिका–८, छिस्तीबाट सदरमुकाम बागलुङ बजार आउँदै गरेको पिकअप भ्यान दुर्घटना हुँदा मृत्यु भएका पाँचैजनाको पहिचान भएको छ ।

जैमिनी–७, जैदी र छिस्तीको सिमाना व्यार्थलानजिकै ग२च ९२४७ नम्बरको भ्यान सोमबार बिहान दुर्घटना हुँदा पाँचजनाको मृत्यु भएको जिल्ला प्रहरी कार्यालयका सूचना अधिकारी एवं प्रहरी निरीक्षक केशव थापाले जानकारी दिए ।

उनका अनुसार, मृत्यु हुनेमा जीपका चालक जैमिनी–८, छिस्ती केवइका ३८ वर्षीय महेन्द्र पुन, सोही ठाउँका २० वर्षीया रश्मी श्रीष, ५० वर्षीया नन्दकली पुन, १७ वर्षीय निरज श्रीष र ७५ वर्षीय कुलप्रसाद श्रीष हुन् । भ्यान सडकदेखि ५०० मिटरभन्दा तल खसेको प्रहरी निरीक्षक थापाले बताए ।

दुर्घटनामा सोही ठाउँका ४५ वर्षीय गंगाबहादुर श्रीष घाइते भएका छन् । उपचारका निम्ति उनलाई धौलागिरि अस्पतालमा ल्याइँदै छ । रासस