काठमाडौं । पुरुष यू–१९ एसिया कप २०२४ का निम्ति नेपाली टोलीको घोषणा गरिएको छ । नेपाल क्रिकेट संघ (क्यान)ले शनिबार एसियन क्रिकेट काउन्सिल (एसीसी)को आयोजनामा हुन लागेको यू–१९ एसिया कपका लागि नेपाली टोली घोषणा गरेको हो ।

हेमन्त धामीको कप्तानीमा १८ सदस्यीय टोलीको घोषणा गरिएको छ । उपकप्तानमा अर्जुन कुमाल रहेका छन् । नेपाली टोलीमा आकाश त्रिपाठी, उत्तम थापा, मयन यादव, नरेन साउद, युनिसविक्रम सिंह ठकुरी, नरेन भट्ट, सन्तोष यादव रहेका छन् ।

युवराज खत्री, रोशन विक, विपीन महतो, राजेश यादव, दयानन्द मण्डल, अपराजित पौडेल, अभिषेक तिवारी, दिलसाद अलि र रन्जित कुमारलाई पनि टोलीमा समावेश गरिएको छ । टोलीको प्रमुख प्रशिक्षकमा शक्ति गौचन र सहायक प्रशिक्षकमा धीरेन्द्र चन्दले जिम्मेवारी पाएका छन् ।

पुरुष यू–१९ एसिया कप २०२४ आउँदो मंसिर १४ गतेदेखि युनाइटेड अरब इमिरेट्स (यूएई)मा आयोजना गरिँदै छ । एसिया कपमा घरेलु टोली यूएई, नेपालसहित आठ राष्ट्र सम्मिलित छन् । आठ टोलीलाई दुई समूहमा विभाजन गरिएको छ । समूह ‘ए’मा भारत, पाकिस्तान, जापान र यूएई छन् । समूह ‘बी’मा नेपालसहित श्रीलंका, बंगलादेश र अफगानिस्तान रहेका छन् ।

नेपालले मंसिर १४ गते हुने पहिलो खेलमा श्रीलंकाको सामना गर्नेछ । यस्तै, मंसिर १६ गते बंगलादेश र १८ गते अफगानिस्तानसँग प्रतिस्पर्धा गर्नेछ ।

दुवै समूहबाट दुई/दुई टोली सेमिफाइनलमा पुग्नेछन् । मंसिर १९ गते सेमिफाइनल खेल हुनेछ । सेमिफाइनलबाट दुवै समूहबाट एक/एक टोली फाइनलमा पुग्नेछन् । रासस