काठमाडौं । अमेरिकी राष्ट्रपतीय निर्वाचनको अन्तिम चुनावी सभामा राष्ट्रपति पदका उमेदवार डोनाल्ड ट्रम्पले अश्लील र रंगभेदी भाषण गरेका छन् । रिपब्लिकन पार्टीबाट राष्ट्रपतिका उमेदवार ट्रम्पले न्युयोर्कस्थित म्याडिसन स्क्वायरमा आयोजित कार्यक्रममा रंगभेदी र अश्लील भाषण गरेर माहोल उत्तेजित पारे ।

आउँदो नोभेम्बर ५ मा हुने निर्वाचन जितेमा आफूले अमेरिकामा गैरकानुनी रूपमा बसिरहेका आप्रवासीलाई देशबाट निकाल्ने उनले वाचा गरे । ट्रम्पले आप्रवासीलाई अपराधीका रूपमा चित्रित गर्दै भने, “म एक न एक दिन अमेरिकी इतिहासकै सबैभन्दा ठूलो डिपोर्टेसन कार्यक्रम सुरु गर्छु । म ती हरेक सहरको उद्धार गर्छु – जो (आप्रवासीको) आक्रमणमा परेका छन्, आप्रवासीले कब्जा गरेका छन् ।”

उनले आप्रवासीलाई अमेरिकाबाट लखेट्न भनेर १८औँ शताब्दीको कानुन फेरि ब्युँताउने वाचा समेत गरेका छन् । आप्रवासीविरुद्ध बोलिरहँदा उनले आफ्ना समर्थकलाई ‘हुटिङ’ गर्न लगाए ।

अमेरिकाका स्वर्णिम दिन फेरि ल्याउनका निम्ति आप्रवासीलाई धपाउनुपर्ने उनले विचार राखे । उनले भने, “अमेरिका हाल (आप्रवासीले) कब्जा गरेको देश बनेको छ । अबको नौ दिनपछि अमेरिका कब्जा गरिएको देश रहने छैन ।”

ट्रम्पले आफ्ना प्रतिद्वन्द्वी डेमोर्क्र्याटहरूलाई देशभित्रकै दुस्मनको आरोप लगाए ।

उनले आफ्नी प्रतिद्वन्द्वी कमला ह्यारिसलाई दुई वाक्य एकैसाथ बोल्न नसक्ने ‘लो आईक्यू भएकी’ महिला भने ।

ट्रम्पको सभामा बोलेका उनका पूर्वअधिवक्ता र न्युयोर्कका पूर्वमेयर समेत रहेका रुडी गिउलियानीले इजरायल–हमास युद्धको सन्दर्भमा कमला ‘आतंकवादी’को समर्थनमा रहेको आरोप लगाए ।

ट्रम्पको चुनावी सभाका वक्ताहरूले कमलालाई ‘राक्षस’को संज्ञा दिए । उनीहरूले पहिलो महिला र काला जातिबाट राष्ट्रपति बन्न लागेकी कमलाले ‘वेश्यावृत्ति’बाट आफ्नो करियर सुरु गरेको आरोप लगाए ।

ट्रम्पको चुनावी सभालाई कतिपय डेमोरक्र्याटहरूले सन् १९९३ मा हिटलर र नाजीका पक्षमा म्याडिसन स्क्वायरमा आयोजित र्‍यालीसँग तुलना गरे ।

सीएनएनले ट्रम्पको यो चुनावी सभालाई आधुनिक राष्ट्रपतीय इतिहासमा सबैभन्दा अतिवादी तर्क पेस गरिएको कार्यक्रमका रूपमा व्याख्या गरेको छ । सीएनएन, एपी र रोयटर्सबाट ।