नवलपुर । नवलपरासी (बर्दघाट सुस्ता पूर्व)मा जंगली च्याउ खाँदा एकै परिवारका पाँचजना बिरामी परेका छन् । शनिबार साँझ जंगली च्याउ खाँदा देवचुली नगरपालिका–२, दुम्कौलीमा एकै परिवारका पाँचजना बिरामी परेका जिल्ला प्रहरी कार्यालयले जनाएको छ ।

जंगली च्याउ खाँदा दुम्कौलीकी २८ वर्षीया धनमाया राजवंशी, २६ वर्षीय मदन राजवंशी, नौ वर्षीया रिदिमा राजवंशी, ४८ वर्षीय बाबुलाल राजवंशी र ४६ वर्षीया रनमाया राजवंशी बिरामी परेका जिल्ला प्रहरी कार्यालयका सूचना अधिकारी एवं प्रहरी नायब उपरीक्षक जेशी शाहले जानकारी दिए ।

चितवनको भरतपुरस्थित पुरानो मेडिकल कलेजमा बिरामीको उपचार भइरहेको छ । हाल सबैको अवस्था सामान्य रहेको शाहले उल्लेख गरे । घटनाबारे थप अनुसन्धान भइरहेको उनले बताए । रासस