काठमाडौं । साफ महिला च्याम्पियसिप २०२४ मा श्रीलंकाविरुद्ध ‘प्लेयर अफ द म्याच’ बनेकी सविता रानामगरले आफ्नो अवार्ड आफ्नी आमाप्रति समर्पण गरेकी छन् ।

बिहीबार समूह चरणको अन्तिम खेलमा श्रीलंकालाई ६–० ले हराउँदा एक गोल गरेकी सविता ‘प्लेयर अफ दी म्याच’ चुनिएकी थिइन् । खेलपछि पत्रकारसँगको कुराकानीका सविताले आफ्नो अवार्ड आमाप्रति समर्पण गर्न चाहेको बताइन् ।

"मेरो आमालाई आजको प्लेयर अफ द म्यान अवार्ड समर्पण गर्न चाहन्छु । आज यहाँ त आउनु भएको छैन । घरबाटै हेरिरहनु भएको होला मेरो यो गेम," सविताले भनिन्, "म राष्ट्रिय टिममा भर्खरै आएको । त्यहीकारण प्रतियोगिताको पहिलो खेल आशा अनुसारको भएन । अलि आत्तिए जस्तो भयो । त्यसपछि दोस्रो केही राम्रो भयो र आज झन् राम्रो भयो ।"

श्रीलंकाविरुद्धको यो जितसँगै नेपाल समूह ‘ए’ को विजेता बन्दै सेमिफाइनल प्रवेश गरेको छ । नेपालले अब फाइनल प्रवेशका लागि आइतबार दोस्रो सेमिफाइनलमा भारतसँग खेल्ने तालिका छ ।