काठमाडौं । ‘जाम जाम स्केट जाम’ शीर्षकको यस कार्यक्रममा वाग्मती प्रदेशको पहिलो खुला स्केट च्याम्पियनसिप सेप्टेम्बर २१–२२ मा आयोजना भएको थियो । ‘हामी आशा गर्छौं कि यदि एक इन्जिनियरले स्केटबोर्ड वा रोलर स्केटलाई दैनिक गतिविधिहरूमा यातायातको रूपमा प्रयोग गरेमा क्याम्पसदेखि होस्टलसम्म १० मिनेट बचाउन सकिन्छ । यसले इन्जिनियरको चार वर्षको इन्जिनियरिङ अध्ययनमा ११ दिनको बचत गर्नेछ ।’ भन्ने नारासहित आयोजना भएको प्रतियोगितामा उपत्यकाभित्रका स्केटप्रेमीरूले सहभागिता जनाएका थिए । 

प्रतियोगिता वाग्मती प्रदेश स्केटिङ र स्केटबोर्डिङ संघको आयोजनामा भएको हो । प्रतियोगिताको सहआयोजकहरू नेपाल स्केटिङ र स्केटबोर्डिङ संघ र नेपाल स्केट क्लब थिए । 

प्रतियोगिताअन्तर्गत दोस्रो दिनको कार्यक्रम थापाथली क्याम्पसबाट पुल्चोक क्याम्पस र त्यसपछि होस्टलतर्फ रोलर स्केटिङको र्यालीको रूपमा आयोजना गरिएको थियो । यस्तै, स्केटबोर्डिङ क्याम्पस गेटदेखि होस्टलसम्म गरिएको थियो । रोलर स्केट २० र २१ सेप्टेम्बरमा दुई दिन सञ्चालन भएको थियो । स्केटबोर्ड २१ सेप्टेम्बरमा परेको विश्व शान्ति दिवसमा आयोजित गरिएको थियो ।

उत्कृष्ट ट्रिकका लागि रामचन्द्र कोइराला हेड जजका रूपमा र रोलर स्केटका सबै खेलहरूको लागि रोनित पुजारी, सुजीत देउला, राजु नेपाली र गजेन्द्र बर्देवा महिलाका खेलहरूको लागि जजको रूपमा थिए । यस प्रतियोगिताले सबै प्रदेशबाट शीर्ष स्केटरहरूलाई एकसाथ ल्याउँदै विभिन्न श्रेणीहरूमा रोमाञ्चक प्रदर्शनहरू प्रदान गर्यो, जसमा अत्यधिक अपेक्षित स्केटको खेल, उत्कृष्ट ट्रिक र रोलर स्केट रेस समावेश थियो । 

पुरुषहरूको स्केटको खेलमा वसन्त राई विजयी भए, जसले बोर्डमा आफ्नो कौशल र सिर्जनशीलता प्रदर्शन गर्दै शीर्ष स्थानसहित १२ हजार ५०० पुरस्कार जिते । दोस्रो स्थानका सरदकुमार राई ६ हजार रुपैयाँ पुरस्कार प्राप्त गरे । सरोज मगरले तेस्रो स्थानमा हासिल गर्दै चार हजार जित्दा विनोद कार्कीले चौथो स्थान हासिल गरेर दुई हजार रुपैयाँ पाए ।

उत्कृष्ट ट्रिक श्रेणीमा उत्कृष्ट स्टन्टहरू देखाएर उसान आले मगरले पहिलो हुँदै १२ हजार ५०० रुपैयाँ पुरस्कार जिते । सरदकुमार राईले यहाँ पनि आफ्नो खेल प्रदर्शन गरेर दोस्रो बन्दै ६ हजार रुपैयाँ पुरस्कार जित्दा जीवन तामाङले तेस्रो स्थान हासिल गर्दै तीन हजार रुपैयाँ पुरस्कार पाए । 

महिलाहरूको ‘गेम अफ स्केट’मा पहिलो स्थानमा समीक्षा राई, दोस्रो समिरा राना मगर र तेस्रो अर्लिन लामा हरेकले २ हजार ५०० प्राप्त गरे । 

रोलर स्केट रेसअन्तर्गत पुरुषहरूको श्रेणीमा, अर्थ बोहराले शीर्ष स्थान हासिल गर्दै २० हजार रुपैयाँ जिते । राजन मक्राँतीले दोस्रो स्थान चुम्दै १० हजार जिते । तेस्रो भएका विजय खनालले सात हजार ५०० र चौथो बनेका सौहर्द श्रेष्टले पाँच हजार रुपैयाँ जिते । 

महिलाहरूको रेसमा, सन्ध्या आले मगरको प्रभुत्व प्रदर्शन गरिन् । यही प्रदर्शनका आधारमा पहिलो बन्दै उनले पाँच हजार रुपैयाँ जितिन् । नयना शाक्य र तृष्णा थापा मगरले क्रमशः दोस्रो र तेस्रो स्थान हासिल गर्दै तीन हजार र दुई हजार रुपैयाँ पुरस्कार जिते । अन्य गतिविधिहरूमा हाई जम्पमा सोनम गुरुङ पहिलो बन्दै दुई हजार ५०० जिते । जिग ज्यागमा सफल थापामगरले चपलता र सटिकतासहितको प्रदर्शनका कारण दुई हजार ५०० रुपैयाँ जिते । 

विशेष पहिचानमा, गजेन्द्र बर्देवालाई स्केटबोर्डिङको उत्कृष्ट खेलाडीको रूपमा सम्मानित गरिएको थियो । उनले पाँच हजार रुपैयाँ पुरस्कार प्राप्त गरे ।

प्रतियोगितापछि प्रदेशका अध्यक्ष इन्जिनियर प्रकाश श्रेष्ठले थापाथली क्याम्पसमा रोलर स्केट कार्यक्रम सम्पन्न भएको बताए । पुल्चोक क्याम्पसमा स्केटबोर्ड कार्यक्रम प्रतिनिधिसभा सांसद दुर्लभ थापाको उपस्थितिमा भएको थियो । समापन कार्यक्रममा वाग्मती प्रदेशका अध्यक्षले बिमा कम्पनीसँग समन्वय गर्दै स्वास्थ्य बिमा गर्न सजिलो हुने भएकाले खेलाडीहरूले केन्द्रीय सघंमा दर्ता गर्नुपर्ने बताए । 

उनले प्रत्येक स्थानीय सरकारको निकायमा पार्क बनाउने धारणा राखेको र चाँडै आफ्नो पिताको स्मृतिका लागि रेड पाण्डा पार्कमा भोलानाथ स्मृति स्केट पार्क सुरु गर्ने योजना रहेको बताए । 

विश्व शान्ति दिवसको अवसरमा, मुख्य अतिथि दुर्लभ थापाले सरकार र सम्बन्धित निकायहरूले सबै ठाउँमा पार्क बनाउनमा ध्यान दिनु पर्ने र कम्तिमा पनि नेपालका सबै महानगरका सहरहरूमा स्केट पार्क हुनुपर्ने उल्लेख गरे । कार्यक्रममा नेपालका पहिलो स्केटर रामचन्द्र कोइरालाले पनि स्केट क्षेत्रको आफ्नो यात्राबारे अनुभव बाँडे । 

वाग्मती प्रदेशका उपाध्यक्षले भविष्यमा संघले काठमाडौं उपत्यकाबाहेक अन्य ठाउँहरूमा पनि थप कार्यक्रम गर्ने बताए । 

दुई दिनको कार्यक्रमका संयोजक महासचिव साजन देउजाको समन्वयमा सदस्य बिभुसा बजागाईं र सह–सचिव माइकल पूजाको पनि सक्रिय सहभागिता थियो । कार्यक्रमको दोस्रो दिन २२ सेप्टेम्बरमा केन्द्रीय सदस्य सचिव दिनेश बजागाईंको समन्वयमा पुरस्कार वितरण गरिएको थियो ।