काठमाडौं । रियाल मड्रिडका प्रशिक्षक कार्लो एन्सेलोट्टीले किलियन एमबाप्पेले क्लबबाट अझ धेरै गोल गर्नुपर्ने बताएका छन् ।

युरोपियन च्याम्पियन रियाल मड्रिडले मंगलबार बोरुसिया डर्टमन्डलाई घरेलु मैदानमा आतिथ्यता प्रदान गर्दै छ । यसअघि, गत वर्ष रियालले प्रतियोगिताको फाइनलमा डर्टमन्डलाई नै २–० ले हराउँदै च्याम्पियन्स लिग जितेको थियो । 

मंगलबार घरेलु समर्थकमाझ जर्मन टिमविरुद्ध मैदान उत्रिँदा रियाल यसअघि लिलसँग बेहोरेको हार भुलाउने लक्ष्यमा हुने छ । रियालले यसअघि अर्को क्लब लिलसँग १–० को अप्रत्याशित हार बेहोरेको थियो । एन्सेलोट्टीले एमबाप्पेले गोल गर्नुपर्ने बताउँदा जारी सिजन नौ खेल खेल्दा पनि गोलविहीन रहेका जुड बेलिङ्घमको भने प्रतिरक्षामा उत्रिए । 

“म एमबाप्पेले गोल गरून् भन्ने चाहन्छु । म उनले विपक्षीलाई दबाब दिनुभन्दा पनि गोल गरेको हेर्न चाहन्छु,” एन्सेलोट्टीले भने, “हामी बेलिङ्घमको कामबाट सन्तुष्ट छौँ । उनी मैदानमा कडा मेहनत गर्छन्, प्रतिस्पर्धा गर्छन् । उनले गत वर्षको जस्तो गोल गरेका छैनन् । तर, बेलिङ्घमको भूमिका गोल गर्नुभन्दा पनि महत्त्वपूर्ण छ ।”

यसै सिजनको सुरुमा पेरिस सेन्ट जर्मन (पीएसजी) बाट स्पेनिस क्लब आएका एमबाप्पेले रियालबाट १२ खेलमा आठ गोल गरेका छन् । यता, गत सिजन रियाल भित्रिएका बेलिङ्घमले भने यस सिजन गोलको खाता खोल्न सकेका छैनन् । उनले गत सिजन क्लबबाट ४२ खेल खेल्दा २३ गोल र १३ असिस्ट गरेका थिए ।