काठमाडौं । बेलायतमा स्वर्ण पदक जितेर फर्केको नेपाली सेनाको टोलीलाई ‘प्रधानसेनापति प्रशंसा निसान’ प्रदान गरिएको छ । सैनिक मुख्यालय जंगी अड्डामा आइतबार आयोजित एक विशेष कार्यक्रमबीच प्रधानसेनापति अशोकराज सिग्देलले टोलीलाई ‘प्रधानसेनापति प्रशंसा निसान’ प्रदान गरेका हुन् ।

बेलायतमा सञ्चालन भएको ‘एक्ससाइज क्याम्ब्रेन पाट्रोल २०२४’ नेपाली सेनाको टोलीले स्वर्ण पदक जितेको थियो ।

“अन्तर्राष्ट्रियस्तरको सैनिक प्रतियोगितामा उत्कृष्ट नतिजा ल्याई नेपाल र नेपाली सेनाको छवि एवं गौरव बढाउन पुर्‍याएको योगदानको उच्च मूल्यांकनस्वरूप प्रतियोगितामा सहभागी नौ जना प्रतियोगी र एक जना व्यवस्थापक सहित १० जना सकलदर्जालाई ‘प्रधानसेनापति प्रशंसा निसान’ द्वारा सम्मान गरिएको हो,” नेपाली सेनाले आइतबार जारी गरेको विज्ञप्तिमा भनिएको छ ।

२०८१ असोज १८ गतदेखि २७ गतेसम्म बेलायतको वेल्स, ब्रेकनमा सञ्चालित अभ्यासमा ३७ देशका १२१ टोली सहभागी थिए ।

सन् १९६० बाट वार्षिकरूपमा सञ्चालन हुँदै आएको ‘एक्ससाइज क्याम्ब्रेन पाट्रोल’मा नेपाली सेनाले सन् २०१४ बाट भाग लिँदै आएको छ । प्रतियोगितामा नेपाली सेनाले सन् २०१७, २०१९ र २०२४ गरी तीनपटक स्वर्ण पदक जितेको छ ।