काठमाडौं । फेसबुकको मुख्य कम्पनी मेटाले ह्वाट्सएप, इन्स्टाग्राम र रियालिटी ल्याबलगायतबाट आफ्ना कर्मचारी हटाउन थालेको बताइएको छ । कम्पनीले ठूलो संख्यामा कर्मचारी कटौती गर्नुभन्दा पनि विभिन्न टिमलाई पुन:व्यवस्थित गरिरहेको ठानिएको छ ।

मेटाका केही कर्मचारीले आफूलाई जागिरबाट हटाइएको कुरा सामाजिक सञ्जालमा पोस्ट गर्न थालेका छन् ।

कम्पनीका प्रवक्ता डेभ अर्नाेल्डले मेटाका केही टिमलाई कम्पनीको लक्ष्य र रणनीतिअनुरूप फेरबदल गरिएको बताएका छन् । यसअन्तर्गत कर्मचारीलाई फरक स्थानमा सारिएको र अवसर नमिलेका कर्मचारीको हकमा प्रयास गरिरहेको उनले बताएका छन् ।

कोभिड–१९ को माहामारीपछि मेटाले सन् २०२२ मा ११ हजार र सन् २०२३ मा १० हजार कर्मचारी कटौती गरेको थियो । यसवर्ष कम्पनीले रियालिटी ल्याबका केही कर्मचारी कटौती गरेको थियो ।

द भर्जबाट ।