काठमाडौं । यो साता तीन कारोबार भएकोमा तीन दिन नै बजार बढेर बन्द भएको छ । दसैँपछिको पहिलो साताको तीन कारोबार दिनमा बजार ७७.१९ अंकले बढेको हो ।

यो साता तीन कारोबार दिनमा १५ अर्ब ९१ करोड ५३ लाख रुपैयाँको सेयर कारोबार भएको हो । दसैँपछि बजार खुलेको पहिलो दिन ३१.४९ अंकले, दोस्रो दिन ४३.२२ अंकले र तेस्रो दिन २.४८ अंकले बजार बढेको हो ।

यो साताको मंगलबार तीन अर्ब ६ करोड २३ लाख रुपैयाँको सेयर कारोबार भएको थियो । बुधबार पाँच अर्ब ६६ करोड दुई लाख रुपैयाँको सेयर कारोबार भएको थियो । त्यस्तै, बिहीबार भने साता अर्ब १९ करोड २७ लाख रुपैयाँको सेयर कारोबार भएको हो ।

गत साताको तुलनामा यो साता कारोबार रकममा कमी आएको छ । यो साता १५ अर्ब ९१ करोड ५३ लाख रुपैयाँको सेयर खरिद–बिक्री भएको छ । गत साताको पाँच कारोबार दिनमा २१ अर्ब ५८ करोड ९३ लाख रुपैयाँको सेयर खदिर–बिक्री भएको थियो ।

गत साता चार दिन सेयर कारोबार भएको र यो साता तीन दिन मात्र सेयर कारोबार भएकाले कारोबार रकममा कमी हुन पुगेको देखिन्छ । गत साता बजार मंगलबार बजार घटेको थियो । आइतबार, सोमबार र बुधबार बजार बढेको थियो ।

पछिल्ला दिनमा दैनिक कारोबार रकम बढेसँगै कुल बजार पुँजीकरण बढ्दै गएको छ । यो साताको अन्तिम दिनसम्म कुल बजार पुँजीकरण ४३ खर्ब ६५ अर्ब ३९ करोड रुपैयाँ कायम भएको छ । गत साताको अन्तिम कारोबार दिन कुल बजार पुँजीकरण ४२ खर्ब ४२ अर्ब ६६ करोड रुपैयाँ कामय थयो ।