रियाद । फुटबल भन्नासाथ यो पुस्ताले झट्टै याद गर्ने नाम हुन्, लियोनल मेसी र क्रिस्टियानो रोनाल्डो । यी दुई खेलाडीमध्ये को सर्वश्रेष्ठ भन्नेमा हरेक मिनेट सामाजिक सञ्जालमा बहस र विवाद भइरहेको पाइन्छ ।

कतारमा सन् २०२२ मा फिफा विश्वकप सुरु हुनुअघिसम्म रोनाल्डो इंग्लिस क्लब म्यानचेस्टर युनाइटेडका खेलाडी थिए । विश्वकप सुरु भएको केही दिनमै रोनाल्डो र म्यानचेस्टर युनाइटेडबीचको सम्झौता तोडियो । प्रशिक्षक एरिक टेन हाग र क्लबविरुद्ध सार्वजनिक रूमा केही अभिव्यक्ति दिएपछि युनाइटेडले पोर्चुगिज स्टारसँगको सम्झौता तोड्ने निर्णय गरेको थियो ।

सन् २००३ देखि ००९ सम्म युनाइटेडमा करियरकै सुन्दर युग बिताएका रोनाल्डोले दोस्रो सहकार्य उस्तै बनाउन सकेनन् ।

युनाइटेडसँगको सम्झौता तोडिएपछि कतार विश्वकपभर उनी कता जान्छन् भन्ने चर्चा शिखरमा रह्यो । आकलन थियो, रोनाल्डोले युरोप छोड्ने छैनन् । तर, सबैलाई चकित बनाउँदै उनी २०२३ को जनवरीमा साउदी प्रो लिगको क्लब अल–नासरमा अनुबन्ध भए ।

अल नासरमा रोनाल्डोको आगमन साउदीमा मात्र नभई विश्व फुटबलमा नै ठूलो तरंग थियो । दुई वर्षको सम्झौतासहित मध्यपूर्वी खाडी मुलुकको क्लबमा अनुबन्धित रोनाल्डो त्यहाँ २०२५ को जुनसम्म बस्नेछन् ।

उनको आगमनले विश्वबजारमा साउदी प्रो लिगको स्तर ह्वात्तै बढ्यो । विभिन्न रिपोर्टका अनुसार, रोनाल्डो आएपछि साउदी प्रो लिगको भ्युअरसिप सात गुणा बढेको छ ।

रोनाल्डोको आगमन साउदीमा फुटबल संस्कारको आधार
साउदीमा निःसन्देश फुटबल सबैभन्दा चर्चित छ । तर, यहाँ अझैसम्म युरोपजसरी फुटबल संस्कारका रूपमा विकास भएको पाइँदैन ।

रोनाल्डोको आगमनले साउदीलाई विश्वमञ्चमा अलग पहिचान दिलाएको सबैलाई थाहै छ । विश्वभर रोनाल्डोलाई करोडौँ समर्थक र लाखौँ मिडियाले पछ्याउँछन् । यी सबैको ध्यान अहिले रोनाल्डो र साउदी लिगमा छ । साउदी लिगमा रोनाल्डोको आगमनपछि साडियो माने, टालिस्का, करिम बेन्जेमा, एन्गोलो कान्टेजस्ता थुप्रै सुपरस्टार आएका छन् । यसले साउदीमा फुटबल संस्कार बसाउने आधारका रूपमा काम गरिरहेको छ ।

अघिल्लो शनिबार (असोज १९) अल नासरले प्रो लिग २०२४–२४ अन्तर्गत अल ओरुबाहविरुद्ध खेल्दा रोनाल्डोको जर्सीसहित मैदान स–साना बालबालिकाको उपस्थिति राम्रै थियो ।

आफूलाई रोनाल्डो र अल नासरको समर्थक बताउने इब्राहिम उनको आगमनले विश्व फुटबलको ध्यान साउदीमा खिचेको बताउँछन् । “रोनाल्डोले आगमनपछि विश्वले साउदी लिग पनि बलियो छ भन्ने बुझ्दै गएको छ । रोनाल्डोको पथ पछ्याउँदै अरू थुप्रै खेलाडी आउँदा यसले यहाँको फुटबल माहोललाई झनै माथि उकासेको छ । लिगमा चर्चित खेलाडीको आगमन हुँदा यसले साउदीमा फुटबल कल्चर विकास गर्न निकै सहयोग गर्नेछ,” इब्राहिम भन्छन् ।

अब्दुल रहमानको मत भने केही आलोचनात्मक छ । उनलाई लाग्छ, साउदीले बुढा खेलाडीमा आवश्यकभन्दा धेरै लगानी गरिरहेको छ ।

“रोनाल्डोको आगमनले पक्कै पनि साउदी लिगको चर्चा धेरै छ, तर मलाई लाग्छ, साउदीले बुढा खेलाडीमा धेरै लगानी गरिरहेको छ । यसले अहिलेलाई राम्रो भएको जस्तो देखिए पनि दीर्घकालीन फुटबल योजनालाई फाइदा गर्दैन,” अब्दुल आफ्नो फरक मत यसरी जाहेर गर्छन् ।

धेरै रिपोर्टका अनुसार, अल नासरले रोनाल्डोलाई मात्र वार्षिक करिब २१३ मिलियन डलर तिर्ने गर्छ । यसाअनुसार रोनाल्डो हाल विश्वकै ‘हाइएस्ट पेड’ फुटबलर हुन् । रोनाल्डोपछि प्रो लिगमा अनुबन्धित टालिस्का, बेन्जेमा, माने र एन्गोलो कान्टेजस्ता खेलाडी पनि करियरको उत्तरार्द्धमा छन् । तर पनि यी सबैको पारिश्रमिक औसतभन्दा माथि नै देखिन्छ ।

साउदीले यी खेलाडीमाथि गरेको लगानीले साँच्चै फुटबलको संस्कार बसाउला ? त्यो भने हेर्न बाँकी छ ।