वासिङटन । अमेरिकी सेनाले शुक्रबार यमनको हुथी नियन्त्रित क्षेत्रका १५ लक्ष्यमा आक्रमण गरेको जनाएको छ । यमनका चार प्रान्तमा आक्रमण गरिएको इरान समर्थित अल मसीरा टेलिभिजन नेटवर्कले जनाएको छ ।

जहाजमाथि हमला गर्ने हुथीको क्षमतालाई रोक्ने उद्देश्यले संयुक्त राज्य अमेरिका र बेलायतले बारम्बार आक्रमण गरिरहेका छन् । तर, लालसागर र एडनको खाडी पार गर्ने व्यापारिक जहाजमा विद्रोहीको आक्रमण जारी छ ।

मध्यपूर्वमा अमेरिकी सेनाका निम्ति जिम्मेवार सैन्य कमान्डले सामाजिक सञ्जालमा भनेको छ, “अमेरिकी सेन्ट्रल कमान्ड (सेन्टकम) सेनाले आज यमनको हुथी नियन्त्रित क्षेत्रका १५ हुथी लक्ष्यमा आक्रमण गरेको छ ।”

सेन्टकमले अगाडि भनेको छ, “यी लक्ष्यमा हुथी आक्रामक सैन्य क्षमता थिए । नेभिगेसन स्वतन्त्रताको रक्षा गर्न र अन्तर्राष्ट्रिय जललाई अमेरिका, गठबन्धन र व्यापारिक जहाजका निम्ति सुरक्षित बनाउन यो आक्रमण गरिएको हो ।” 

हुथी समूहले गाजा युद्धको समयमा प्यालेस्टाइनीसँग एकताको संकेत गर्ने उद्देश्यले नोभेम्बरदेखि नै इजरायलसँग सम्बन्धित जहाजमा आक्रमण गर्दै आएको छ ।

हुथी हमलाको जवाफमा इजरायलले पनि यमनमा आक्रमण गरेको छ । विद्रोहीले इजरायलको बेन गुरियन विमानस्थलमा हमला गरेको बदलामा गएको महिना होदेइडामा इजरायली आक्रमणमा कम्तीमा पाँचजनाको मृत्यु भएको थियो । रासस/एएफपी