काठमाडौं । सरकारले बजेटमार्फत घोषणा गरेको आईटी पार्क एवं वर्क स्टेसनसम्बन्धी पूर्वाधारका लागि बजेट उपलब्ध गराएको छैन । चालु आर्थिक वर्षको बजेटमा ‘वर्क स्टेसन’ र ‘आईटी पार्क’ सम्बन्धी व्यवस्था गर्ने विषय उल्लेख गरिएको थियो ।

सञ्चार तथा सूचना प्रविधि मन्त्रालयले यसका लागि बजेट व्यवस्था नभएको बताएको छ । गत जेठ १५ गते तत्कालीन सरकारले घोषणा गरेको बजेटमा काठमाडौं उपत्यका र बुटवलमा उपलब्ध सरकारी तथा निजी भवन उपयोग गरी सूचना प्रविधि पार्क र वर्क स्टेसन सञ्चालन गर्ने विषय उल्लेख गरिएको थियो ।

उच्च गतिको इन्टरनेट, विद्युत्, सुरक्षालगायत पूर्वाधारसहित सूचना प्रविधि (आईटी) पार्क सञ्चालनको काम अघि बढाइने विषयमा बजेटमा समेटिएको थियो । यस्ता पार्कमा तीन वर्षका लागि वर्क स्टेसन सञ्चालन गर्न निःशुल्क स्थान उपलब्ध गराइने समेत बजेटमा उल्लेख छ ।

बजेट घोषणा भएपछि सरकार फेरिएको छ । अहिले सरकारले यसका लागि बजेट नछुट्याएको सञ्चार मन्त्रालयका प्रवक्ता गजेन्द्रकुमार ठाकुरले बताए । उनले भने, “आईटी पार्क र वर्क स्टेसनका लागि बजेट व्यवस्था भएको छैन । यस वर्ष कानुनी र संस्थागत फ्रेमवर्क बनाएर अर्काे कार्यान्वयनमा जाने कुरा छ ।”

चालु आर्थिक वर्षलाई सूचना प्रविधि दशकको प्रस्थान वर्षका रूपमा अघि बढाई विभिन्न काम गर्ने विषय बजेटमा समावेश गरिएको थियो । सरकारले स्वदेशमा उत्पादित सफ्टवेयरलाई प्राथमिकतामा दिने, डाटा सेन्टरको लागि मापदण्ड तयार गरिने, विद्युतीय तथ्यांकको भण्डारण, सुरक्षा र उपयोगलाई व्यवस्थित तथा भरपर्दाे बनाइनेलगायत विषय बजेटमा राखेको थियो ।

दश वर्षमा सूचना–प्रविधि क्षेत्रबाट ३० खर्बको निर्यात गर्ने र पाँच लाख प्रत्यक्ष तथा दश लाख अप्रत्यक्ष रोजगारी सिर्जना गर्ने लक्ष्य सरकारले बजेटमा राखेको थियो । सरकारले डिजिटल नेपाल फ्रेमवर्कको परिमार्जन गर्न ५९ करोड रुपैयाँ विनियोजन गरेको थियो भने ललितपुरको खुमलटारमा ज्ञानपार्क स्थापना गर्न १७ करोड विनियोजन गरेको घोषणा गरेको थियो । बजेटमा उल्लेख भएअनुसार हालसम्म कुनै पनि विषयले गति लिएको छैन ।