काठमाडौं । राष्ट्रिय महिला लिग–२०२४ को पहिलो चरणमा साविक विजेता एपीएफ अपराजित बनेको छ । शुक्रबार एपीएफले लिग पहिलो चरणको आफ्नो अन्तिम खेलमा सर्लाहीको वाग्मती युवा क्लबविरुद्ध ७–० को सहज जित निकालेको हो । 

एपीएफलाई जित दिलाउन फरवार्ड रश्मीकुमारी घिसिङले चार गोल गरिन् । कप्तान अनिता बस्नेत र सविता रानामगरले समान एक गोल थपे । एपीएफले अर्को गोल भने वाग्मतीका खेलाडीबाट आत्मघाति उपहार पाएको थियो । 

खेलको ३५औँ मिनेटमा रश्मीले गोल गर्दै एपीएफलाई अग्रतामा राखेकी थिइन् । ४०औँ मिनेटमा वाग्मतीकी सुनिता भुलनबाट आत्मघाति गोल हुँदा पहिलो हाफमा एपीएफले २–० को अग्रता बनाएको थियो । 

दोस्रो हाफमा एपीएफले पाँच गोल थप्यो । ४७औँ मिनेटमा अनिताले टिमका निम्ति तेस्रो गोल गरिन् । ५७औँ मिनेटमा रश्मीको गोलमा एपीएफले अग्रतालाई ४–० मा पुर्याएको थियो । ८२औँ मिनेटमा रश्मीले ह्याट्रिक गर्दै अग्रतालाई ५–० मा राखिन् । ८८औँ मिनेटमा रश्मीले चौथो गोल गर्दै अग्रतालाई ६–० मा पुर्याइन् । इन्जुरी समयमा सविता रानामगरले गोल गरेपछि एपीएफले ७–० को जित पक्का गरेको हो । 

जितसँगै नौ खेलबाट २५ अंक जोडेको एपीएफ तालिकाको शीर्ष स्थानमा छ । एपीएफले पहिलो चरणका आठ खेलमा जित र एक खेलमा बराबरीको नतिजा निकालेको छ ।

 समान खेलबाट १० अंक जोडेको वाग्मती भने तालिकाको छैटौँ स्थानमा छ ।