काठमाडौं । प्रहरी प्रभाग भैँसेपाटीकी प्रहरी निरीक्षक (इन्स्पेक्टर) बिनुकुमारी शाहीमाथि प्रहरीले मुद्दा चलाउने तयारी गरेको छ । उनीमाथि ‘हनी ट्रयाप’ गिरोहसँग मिलेमतो गरेर एक युवाबाट ३० लाख रुपैयाँ असुल गरेको आरोप छ । सो आरोपपछि शाहीको जिम्मेवारी खोसिएको  छ । 

शाहीकै योजनामा एक जग्गा व्यवसायीलाई बलात्कारको मुद्दा चलाउने भन्दै ३० लाख असुल गरेको खुलेपछि उनीमाथि समेत ललितपुर प्रहरीले मुद्दा चलाउने तयारी गरेको हो ।

त्यसका लागि जिल्ला प्रहरी परिसर ललितपुरले उनलाई पहिले निलम्बन गर्न सिफारिस गरेको हो । निलम्बनका लागि उपत्यका प्रहरी कार्यालय रानीपोखरीलाई पत्राचार गरिएको ललितपुर प्रहरी परिसरका प्रमुख एसएसपी शेखर खनालले जानकारी दिए ।

उपत्यका प्रहरी कार्यालय स्रोतले भन्यो, “इन्स्पेक्टर शाहीमाथि मुद्दा नै चलाउनुपर्ने केही आधार देखिएको छ । हामी त्यसको तयारीमा छौँ । थप प्रमाण भेटिए मुद्दा चल्छ ।”

ललितपुर प्रहरीले शाहीको मोबाइल नियन्त्रणमा लिएको छ । ललितपुर प्रहरीको नियन्त्रणमा रहेका युवा ताज स्लामको मोबाइल ‘आइफोन १४ प्रो म्यास’ भने गायब छ । प्रहरी स्रोतका अनुसार प्रहरी निरीक्षक शाहीले नै ताजको मोबाइल गायब पारेका हुन् । 

शाही ललितपुर प्रहरी कार्यालयमा तानिएपछि ताजको मोबाइल नै गायब भएको हो । प्रहरी स्रोतका अनुसार इन्स्पेक्टर शाहीले आफू र ताजबीच भएको कुराकानी प्रमाणको रूपमा हुने भएकाले गायब पारेकी हुन् । 

शाहीले आफू र ताजबीच मोबाइलको म्यासेजमा भएको कुराकानी समेत हटाएकी छन् । 

• ‘हनी ट्रयाप’मा पारेर प्रहरी कार्यालयभित्रै ३० लाख असुल, इन्स्पेक्टरलाई निलम्बन सिफारिस

इटहरीमा योजना असफल भएपछि भैँसेपाटी
ललितपुर प्रहरीको प्रारम्भिक अनुसन्धानका क्रममा ‘हनी ट्रयाप’को योजना इटहरीमा असफल भएपछि भैँसेपाटी पुगेको खुलेको छ । युवाबाट इलाका प्रहरी कार्यालय इटहरीको प्रहरी नै प्रयोग गरेर रकम असुल्ने योजना असफल भएको थियो । 

प्रहरी स्रोतका अनुसार ललितपुरका जग्गा व्यवसायी केही समयअघि इटहरी पुगेका थिए । त्यही बेला हाल ललितपुर प्रहरीको थुनामा रहेकी युवती सुस्मा विकसँग इटहरी र इलाम घुमफिर गरे । घुमफिरका साथै होटेलमा सँगै बसे । त्यसपछि युवा ललितपुर फर्किए । सुस्मा र युवाबीच फोनमा सम्पर्क भइरहन्थ्यो । सुस्माले युवा पैसावाल व्यवसायी भएको थाहा पाइसकेकी थिइन् । युवा करिब पाँच करोड पर्ने ल्यानड रोभर प्राडो चढ्थे । त्यही कुरा सुस्माले आफू निकट युवा दर्शन पोखरेललाई ‘सेयर’ गरिन् ।

दर्शन र सुस्मा दाजु–बहिनीका रूपमा असाध्यै मिल्थे । सुस्माको कुरा सुनेपछि दर्शनले व्यवसायीबाट रकम असुल्ने योजना बनाए ।

त्यसका लागि उनीहरू इलाका प्रहरी कार्यालय इटहरी समेत पुगे । तर, त्यहाँ उनीहरूले सोचेजस्तो युवाबाट रकम असुल्न नसकिने निष्कर्ष निकाले । 

त्यही कुरा दर्शनले ताजलाई सुनाए । उनीहरूबीच पूरानो चिनजान थियो । ताज भैँसेपाटी र व्यवसायी युवा समेत ललितपुर बस्ने भएकाले ताजले युवालाई त्यहीको प्रहरी प्रयोग गरेर पैसा असुल गर्न सकिने बताए ।  

भैँसेपाटी प्रहरी प्रमुख शाही र ताजबीच नजिकको सम्बन्ध थियो  । सोही योजनाअनुसार ताजले दर्शन र सुस्मालाई केही दिनअघिमात्रै इटहरीबाट काठमाडौं बोलाए ।

दुवैजना केही दिनदेखि गौशालाको एक होटेलमा बसेका थिए । ताजकै योजनामा दर्शन र सुस्मा होटेलबाट असोज पहिलो साता भैँसेपाटी पुगे ।

ती व्यवसायीबाट असुल हुने कुल पैसामध्ये ५० प्रतिशत प्रहरी निरीक्षक शाहीले लिने तय भइसकेको थियो । सोही योजनाअनुसार सुस्मामार्फत व्यवसायी युवालाई प्रहरी निरीक्षक शाहीले फोन गर्न लगाए । सुस्माको फोनपछि युवा भैँसेपाटी पुगे । त्यही बेला ल्यान्ड रोभर प्राण्डोसहित युवालाई प्रहरी निरीक्षक शाहीले कार्यायलभित्र लगिन् । 

बलात्कारको उजुरी आएको भन्दै युवालाई थर्काइन् । त्यो बेला सुस्मा र ताज पनि सँगै थिए । उनकै अगाडि मुद्दा नचलाउने पैसामा मिलाउने भन्दै ‘बार्गेनिङ’ भयो ।

सुरुमा ६० लाखको बार्गेनिङ ३० लाखमा सहमति जुट्यो । त्यो बेला युवासँग सात लाख रुपैयाँ मात्रै थियो । सहमतिअनुसार ती युवाले दर्शनको खातामा सात लाख रुपैयाँ ट्रान्सफर गरे । बाँकी दुईदिनभित्र दिने बाचा गरे । तर, त्यसका लागि आफ्नो प्राण्डो नै बिक्री गर्नुपर्ने बताएका थिए । 

उनले त्यही दुईदिनमा आफ्नो प्राण्डोलाई बजार मूल्यभन्दा दुई गुणा सस्तोमा बिक्री गरेर बाँकी १३ लाख बैंकमार्फत र १० लाखको चेक काटेको खुलेको छ ।

१३ लाख सुस्माकै एक साथीको खातामा पठाएको खुलेको छ । युवाले खातामा पैसा पठाउँदा भैँसेपाटीका एक प्रहरी समेत पीडित युवासँगै गएको खुलेको छ । घटनाबारे तेस्रो दिनमा भने पीडित युवाका एक साथीले ललितपुर प्रहरीमा जानकारी गराए । त्यसपछि ललितपुर प्रहरीले भैँसेपाटीमा रहेका दर्शन, सुस्मा र ताजलाई समेत कार्यालय झिकाएको थियो ।

सोही अनुसन्धानका क्रममा प्रहरीकै योजनामा ‘हनी ट्रयाप’मा पारेर रकम असुल्ने योजना भएको खुलेको हो । हाल सुस्मा र ताज प्रहरीको थुनामा छन् । शाहीमाथि अनुसन्धान गर्न ललितपुर प्रहरीका डीएसपी नरहरी अधिकारीको नेतृत्वमा पाँच सदस्यीय समिति बनेको छ ।