काठमाडौं । प्रहरीले सहकारीको रकम ठगी प्रकरणमा पूर्वप्रहरी नायव महानिरीक्षक (डीआईजी) छविलाल जोशीलाई पक्राउ गरेको छ ।  उनलाई काठमाडौं प्रहरीको सहयोगमा पोखरा प्रहरीले आइतबार दिउँसो पक्राउ गरेको हो ।

प्रहरी उच्च स्रोतका अनुसार जोशीलाई प्रहरीले जरुरी पक्राउ पुर्जी थमाएर पक्राउ गरेको हो । उनीहरु पक्राउ परेसँगै तत्कालीन गृहमन्त्री रवि लामिछानेलाई समेत प्रहरीले निगरानीमा राखेको छ ।  उच्च प्रहरी स्रोतले भन्यो, “जोशीलाई जरुरी पक्राउ पुर्जी थमाएर समातिएको हो । उनी भाग्ने योजना बनाएको सूचना पाएपछि पक्राउ गरेका हौँ ।”

सहकारी संस्था बचत दुरुपयोग सम्बन्धी संसदीय विशेष समितिले प्रतिवेदनका आधारमा उनी पक्राउ परेका हुन् ।  समितिले ९९ दिन लगाएर तयार पारेको प्रतिवेदन भदौ ३१ मा समितिले संसद्लाई बुझाएको थियो । 
सोही प्रतिवेदन गृहमन्त्रालयले आइतबार मात्रै प्रहरीलाई कार्यान्यनका लागि पठाएको थियो ।

ओखलढुंगाका गितेन्द्रबाबु राई (जीबी) ले सञ्चालन गरेका पोखराको सूर्यदर्शन, बुटवलको सुप्रिम, काठमाडौैंको स्वर्णलक्ष्मी, चितवनको सहारा, वीरगन्जको सानो पाइला सहकारीको रकम अपचलन भएको खुलाएको थियो ।

सहकारीमार्फत सिधै लामिछानेले रकम अपचलन नगरे पनि जीबी राईले नै नेतृत्व गरेको गोर्खा मिडिया नेटवर्कमार्फत् लामिछाने र पूर्वडीआईजी छविलाल जोशीकोसमेत संलग्नता देखिए पछि उनीहरु दुवैजनालाई कारबाही सिफारिस गरेको थियो । ग्यालेक्सी टेलिभिजनमा जोशीको ३५ प्रतिशत सेयर थियो भने रविको १५ प्रतिशस सयेर थियो । 

अर्घाखाँचीका जोशी पूर्वडीआईजी समेत हुन् । ५९ वर्षका जोशीलाई गोर्खा मिडिया नेटवर्कमा सहकारीको रकम लगेको र हिनामिना गरेको आरोप लागेको छ । उनीमाथि सुप्रिम बचत तथा ऋण सहकारी संस्था बुटवलको सदस्य भइ रकम गोर्खा मिडियामा ल्याएको देखिएको संसदीय छानबिन विशेष समितिले गरेको अनुसन्धानले देखाएको थियो ।

तर उनले उक्त विषयलाई अस्वीकार गरेका थिए । उनले सदस्यताका लागि आवेदन पनि नदिएको र उक्त सहकारीमा पुगेर केवाईएम फारम पनि नभरेको बताएका थिए । २०७५ सालमा डीआईजीबाट सेवानिवृत्त भएका उनी २०७७ सालमा नेचर हब्र्सको १० प्रतिशत सेयर लिएर डाइरेक्टर भएका थिए ।

उनी आफू गोर्खा मिडियामा पनि सुरुदेखि नै आवद्ध भएको बताएका थिए । सुरुमा गोर्खा मिडिया नेटवर्कमा जोशी र गितेन्द्रबाबु (जीबी) राईको ५०–५० प्रतिशत सेयर रहेर दर्ता गरिएको थियो । २०७७ मा दर्ता भएको उक्त कम्पनी २०७८ चैतमा पुँजी १२ करोड पुर्‍याउने निर्णय भएको थियो । सो प्रक्रिया गर्नुअघि नै उनीसँग भएको ५० प्रतिशत सेयरमध्ये १५ प्रतिशत रवि लामिछानेलाई बिक्री गरिएको थियो ।

कम्पनीको लागि ऋण लिन नेपाल बैंक न्युरोड शाखामा आफू, रवि लामिछाने र लेखा प्रतिनिधि गएको स्वीकार गरेका छन् ।  उनले आफू २०७८ मै त्यहाँबाट बिदा भएको दाबी गरेका छन् । आफू काठमाडौं परिसरमा रहेका बेला जीबी राई, दिपेश पुनलगायतका व्यक्तिहरु काम लिएर आएको र त्यहीँबाट सम्पर्क अघि बढेको बताएका छन् ।

जोशीले संसदीय समितिमा दिएको बयानअनुसार ग्यालेक्सी टीभीमा रवि लामिछाने सेयरहोल्डर भएपछि सर्बेसर्वा भएको र यो त्यहाँ ल्याइएको रकम कुन प्रयोजनका लागि कसरी आयो भन्ने विषयमा बोर्डको मिटिङ, माइन्युट र सरसल्लाह केही नभएको बताएका थिए ।

यस्तो छ उनले समितिमा दिएको बयान