काठमाडौं । राष्ट्रिय महिला लिग–२०२४ मा पहिलो जित निकाल्ने क्रममा कर्णाली प्रदेशले सुदूरपश्चिम प्रदेशलाई ३–० ले हराएको छ । बुधबार सातदोबाटोस्थित एन्फा मुख्यालयमा भएको खेलमा कर्णालीलाई जित दिलाउन भूमिका बुढाथोकी, गरिमा राई र वर्षा ओलीले समान एक गोल गरे । 

खेलको २४औँ मिनेटमा भूमिकाले गोल गरेपछि कर्णालीले पहिलो हाफमा १–० को अग्रता बनाएको थियो । कर्णालीले दोस्रो हाफमा दुई गोल थप्यो । ६२औँ मिनेटमा गरिमाले कर्णालीको अग्रता दोब्बर बनाइन् । त्यसको अर्को मिनेटमा नै वर्षाले गोल गरेपछि कर्णालीले अग्रतालाई ३–० मा पुर्‍याएको थियो । यसपछि दुवै टिमबाट थप गोल नहुँदा कर्णालीले ३–० को जित पक्का गरेको हो । 

जितसँगै कर्णालीले ६ खेलबाट चार अंक जोडेको छ । समान खेलबाट खेल्दा पनि अंकविहीन सुदूरपश्चिम भने तालिकाको पुछारमा छ । 

यसअघि आजै भएको पहिलो खेलमा रौतहटको चन्द्रपुर नगरपालिकाले विभागीय टोली नेपाल पुलिस क्लबलाई गोलरहित बराबरीमा रोक्दै अंक खोस्न सफल बनेको छ । सातदोबाटोमै भएको खेलको ७०औँ मिनेटमा प्राप्त गोलको सुन्दर अवसरलाई सदुपयोग गर्न नसक्दा विभागीय टोलीलाई स्तब्ध बनाउन चन्द्रपुर चुकेको हो । पुलिसकी समीक्षा घिमिरेको ह्यान्ड भएपछि चन्द्रपुरले पेनाल्टीको अवसर पाएको थियो । 

तर, त्यसमा दिलकुमारी मगरको प्रहार पुलिसकी गोलकिपर उषा नाथले बचाएपछि चन्द्रपुरले विभागीय टोलीलाई निराश बनाउने मौका गुमाएको हो । ६ खेलबाट सात अंक जोडेको चन्द्रपुर तालिकाको छैटौँ स्थानमा छ । समान खेलबाट १२ अंक जोडेको पुलिस तालिकाको दोस्रो स्थानमा छ ।