काठमाडौं । अमेरिकाको खाद्य तथा औषधि प्रशासन (एफडीए)ले एप्पलको वाच सिरिज ९, सिरिज १० र वाच अल्ट्रामा निन्द्रामा श्वासप्रश्वास रोकिने समस्या (स्लीप एपनिया) पत्ता लगाउने फिचरका लागि अनुमति दिएको छ । यसै सेप्टेम्बर २० मा एप्पलको वाच सिरिज १० सार्वजनिक हुँदै छ । त्यसअघि एफडीएले कम्पनीलाई अनुमति दिएको हो ।

यो फिचरलाई एप्पलले सेप्टेम्बर ९ मा एप्पल इभेन्टमा घोषणा गरेको थियो । एप्पलको वाचओएस११ मा यो फिचर आउने भएको हो । कम्पनीले ३० दिनको अवधिका १० रातको निन्द्राको तथ्यांकका आधारमा प्रयोगकर्तामा स्लीप एपनिया रहेको नरहेको निक्र्योल गर्नेछ । यसले निन्द्रामा हुने गरेको अवरोधको तथ्यांक पनि राख्नेछ ।

एफडीएले यो फिचरलाई स्लीप एपनियाको जोखिमलाई मूल्यांकन गर्ने ओभर–दि–काउन्टर उपकरण भनेको छ । एप्पलले यो निदान उपकरणभन्दा पनि प्रयोगकर्तालाई औपचारिक निदानका लागि स्वास्थ्यसंस्थामा जान प्रोत्साहन गर्ने बताएको छ । विभिन्न कारणले श्वास फेर्ने क्रम कम हुने वा रातको समयमा बारम्बार श्वासप्रश्वास रोकिने समस्या स्लीप एपनियामा पर्छ ।

फ्रान्सेली कन्ज्युमर इलेक्ट्रोनिक्स कम्पनी विंथिग्सले यसअघि नै यस्तो फिचर उपलब्ध गराउँदै आएको छ । यसअघि सामसङको वाच सिरिजले पनि एफडीएबाट यसका लागि अनुमति पाइसकेको थियो ।