काठमाडौं । फ्रान्स फुटबल म्यागाजिनले प्रदान गर्ने बालन डी‘अरको मनोनयनमा इंग्ल्यान्डका ६ खेलाडी मनोनीत भएका छन् । 

बुधबार राति सार्वजनिक मनोनयनमा इंग्ल्यान्डबाट कप्तान ह्यारी केन, मिडफिल्डर जुड बेलिंघम, फिल फोडेन र डेक्लान राइस छन् । यस्तै, फरवार्डद्वय बुकायो साका र कोल पाल्मेर पनि मनोनयनमा परेका थिए । 

यसै वर्ष भएको युरो–२०२४ मा इंग्ल्यान्डले फाइनलसम्मको यात्रा तय गर्दा यी खेलाडीको प्रदर्शन उच्च थियो । फाइनलमा भने इंग्ल्यान्डले स्पेनसँग २–१ को हार बेहोरेको थियो । 

मनोनयमा स्पेनका १७ वर्षीय फरवार्ड लामिन यमलले पनि स्थान बनाएका छन् । यसपटक अर्जेन्टिनी स्टार लियोनल मेसी र पोर्चुगलका क्रिस्टियानो रोनाल्डो भने अटाउन सकेनन् । मेसी गत वर्षको बालन डी‘अर विजेतासमेत हुन् । बालन डी‘अरको इतिहासमा सन् २००३ पछि पहिलो पटक मेसी र रोनाल्डो मनोनयनमा नपरेका हुन् । अवार्डको सर्वाधिक सफल खेलाडीसमेत रहेका मेसीले हालसम्म आठ पटक जितेका छन् । यस्तै, रोनाल्डो पाँचपटकको बालन डी‘अर विजेता हुन् ।