काठमाडौं । अभिनेत्री शिल्पा मास्केले चलचित्र ‘देवी’ले नेपाली समाजको विर्सनलायक कथा भन्ने बताएकी छन् । हरेक दिनजसो हुने बलात्कार र महिला हिंसाको कथा चलचित्रले उठान गरेको उनको भनाइ छ । 

बलात्कारपछि हत्या गरिएकी निर्मला पन्तको कथामा मात्रै चलचित्र केन्द्रित नरहेको उनले स्पष्ट पारेकी छन् । “देवी निर्मलाको जस्तै घटना भोग्न बाध्य आमनेपाली महिलाको कथा हो,” उनी भन्छिन्, “महिलाहरू बलात्कृत भइरहे पनि आवाज उठाउन नसकिरहेको अवस्था छ । त्यसैले हामीले यो विषय उठान गरेका छौँ ।”   

बलात्कारपछि केही घटनामा पीडितलाई कारबाही र पीडितलाई न्याय भन्दै आन्दोलन हुने गरे पनि त्यो मौसमी मात्रै हुने उनको टिप्पणी छ । यस्ता घटनाविरुद्ध समाजमा हरेक दिन कुरा उठ्नुपर्ने र यसविरुद्ध चेतना जगाउनुपर्नेमा उनको जोड छ । गम्भीर विषय भए पनि चलचित्रले दर्शकलाई होल्ड गर्ने उनको भनाइ छ । 

अभिनेता नाजिर हुसेनले चलचित्र ‘देवी’ बलात्कारविरुद्धको आवाज भएको बताएका छन् । समाजको यो आवाजलाई बलियो बनाउनुपर्छ भनेर नै आफूले यो चलचित्रमा काम गरेको उनको भनाइ छ । 

“मैले देवीमा खेल्नुको कारण समाजको कथा बोल्नुपर्छ भनेर हो । कन्टेन संवेदनशील भएकाले गर्ने कि नगर्ने भन्ने थियो,” नाजिर भन्छन्, “यो चलचित्र बलात्कारविरुद्धको आवाज हो । घरेलु हिंसाविरुद्धको आवाज हो । त्यसैले खेल्ने निर्णय गरेको हुँ ।”  

समाजमा हरेक दिनजसो बलात्कारका घटना घटिरहेको भन्दै यसविरुद्ध आवाज उठानु कलाकारको पनि दायित्व भएको उनी बताउँछन् । “यस्ता विषय उठाएर खराब कामविरुद्ध आवाज उठाउनु हाम्रो पनि दायित्व हो,” उनले अगाडि थपे, “यस्ता घटना हुनुहुन्न भन्ने आवाज सिनेमाले उठाएको छ ।” 

अभिनेता गौरव पहारीले ‘देवी’जस्ता सिनेमा नेपालमा कमै बनिरहेको बताउँछन् । “यस्ता सिनेमा बन्नुपर्छ भन्ने हो । हाम्रो घर छिमेकमै यस्ता घटना घटिरहेका छन्,” उनी भन्छन्, “त्यही विषयमा यो चलचित्र हो । त्यसैले समाज परिवर्तनका लागि पनि यस्ता चलचित्र बन्नुपर्छ ।”  

‘देवी’ले निर्मलाको विषय मात्रै उठान नगरेर बलात्कारविरुद्धका घटनाको कथा रहेको गौरवको भनाइ छ । “यो हामी सबैले बोल्नुपर्ने मुद्दा हो । अनुसन्धानमा हुने राजनीतिक दबाब सिनेमामा छ,” उनी भन्छन्, “म चलचित्रमा पीडित अफिसरको रूपमा छु । मैले सिनेमामा जुन दबाब भोग्छु, त्यो रियलमा प्रहरी अफिसरहरूले भोगिरहेको समस्या हो ।” 

सन्जोक राईको लेखन तथा निर्देशन रहेको चलचित्र भदौ २१ गते रिलिज हुँदै छ ।