काठमाडौं । राष्ट्रिय स्वतन्त्र पार्टी (रास्वपा)का सांसद हरि ढकालले गौरा पर्वको अवसरमा टुँडिखेलमा आयोजित कार्यक्रममा नाराबाजी गरेको अभियोगमा पक्राउ परेका युवाहरूलाई रिहा गर्न माग गरेका छन् ।

बुधबार प्रतिनिधिसभा बैठकको आकस्मिक समयमा सांसद ढकालले गौरा पर्वमा टुँडिखेलमा आयोजित कार्यक्रममा युवाहरूले गरेको विरोधलाई अराजक शैली भनेर पक्राउ गर्नु गलत भएको बताए । उनले युवाहरूको विरोधका बोली सरकारले सुन्नुपर्ने पनि बताए ।

"स्वदेशमा अवसरबाट वञ्चित, रोजगारीबाट वञ्चित बनाइएका ती युवाहरूले सिंहदरबारभित्रका बेइमानहरूलाई खबरदारी गर्दैगर्दा यसरी समाउन पाइँदैन । ती युवाहरूको तत्काल रिहाको माग गर्न चाहन्छु । साथै विभिन्न जिल्लामा स्टाटस लेखेकै भरमा युवाहरूलाई समातिएको समाचार आएको छ । कमिलाको उड्ने बेलामा प्वाँख पलाउँछ । कमिलाको उड्ने बेलामा प्वाँख पलाएको जस्तो नहोस्," सांसद ढकालले भने ।