काठमाडौं । 'हेर्ने कथा'ले सार्वजनिक गरेको 'हराएका वर्षहरू'का पात्र प्रकाश तामाङले नागरिकता पाउने भएका छन् । प्रधानमन्त्रीकै स्तरबाट पहल भएपछि प्रकाशको नागरिकता बनाउने पक्रिया अगाडि बढेको हो ।

प्रधानमन्त्री केपी शर्मा ओलीले प्रकाशको नागरिकता छिटो बनाउने विषयमा गए राति नै गृहसचिव एकनारायण अर्याललाई बोलाएर छलफल गरेको बताएका छन् । गृहसचिव अर्यालले दुई–चार दिनभित्रै नागरिकता दिलाउन सहजीकरण गर्ने व्यवस्था मिलाएको बताएका छन् ।

ओलीका अनुसार नागरिकता प्राप्त गरिसकेपछि प्रकाशलाई सरकारले आवश्यक सहयोग गर्ने पनि तयारी गरेको छ ।

यसबारे प्रधानमन्त्रीले ओलीले सामाकजिक सञ्जालमा भनेका छन्, "नागरिकता छिटो बनाउने विषयमा राति १० बजे नै गृहसचिव एकनारायण अर्याललाई बोलाएर उहाँसँग कुरा भयो । उहाँले प्रकाशलाई दुई/चार दिन भित्रैमा नागरिकता दिलाउन सहजीकरण गर्ने व्यवस्था मिलाउनु भएको छ र यो खबर प्रकाशलाई पनि पठाइसकिएको छ । नागरिकता प्राप्त गरिसकेपछि प्रकाशलाई आवश्यक सहयोग गर्ने विषयमा पनि कुरा भएको छ ।"

३५ वर्ष घरबार–ठेगानाविहीन भएका प्रकाश 'हेर्ने कथा' टिमको सक्रियतामा आफ्नो परिवारलाई भेट्न सफल भएका थिए । ०८१ को दसैँमा घर फर्किएका उनले नागरिकता बनाउने प्रयास गरेका थिए । तर, बसाइँसराइको कागजातको अभावका कारण उनले नागरिकता बनाउन पाएका थिएनन् ।