काठमाडौं । नाडा अटोमोबाइल्स एसोसिएसन अफ नेपालको १६औँ संस्करणको नाडा अटो शो काठमाडौंको भृकुटीमण्डपमा सुरु भएको छ । नाडामा चार पांग्रे तथा दुई पांग्रे सवारी ब्रान्डका विभिन्न नयाँ मोडलहरू सार्वजनिक भएका छन् । 

मंगलबारदेखि भदौ १६ गतेसम्म चल्ने शोमा नयाँ सवारी खरिद तथा बुकिङ गर्नेलाई कम्पनीहरूले विभिन्न छुट योजनाहरू राखेका छन् ।

नाडा अटो शोमा सबैभन्दा धेरै विद्युतीय सवारी (ईभी)को आर्कषण रहेको छ । सबैजसो कम्पनी तथा ब्रान्डहरूले आफ्ना ईभी गाडी तथा मोडललाई विशेष प्राथमिकताका साथ प्रदर्शनमा राखेका छन् ।

यस्ता छन् नयाँ ईभी र मूल्य
बीवाईडी– बीवाईडीको आधिकारिक वितरक साइमेक्स इंकले शोमा आफ्नो बीवाईडी एट्टो ३ को विशेष रूपमा अपग्रेड गरिएको २०२४ संस्करण प्रदर्शनमा राखेको छ । यो गाडीको ४९.९२ किलोवाटआवरको ब्याट्री, १०० किलोवाटको मोटर, ३१० एनएम टर्क र ३४५ किलोमिटर रेन्ज रहेको एड्भान्स मोडेलको मूल्य ५६ लाख ९० हजार छ । यस्तै, ६०.४८ किलोवाटआवरको ब्याट्री, १०० किलोवाटको मोटर, ३१० एनएम टर्क र २४० किलोमिटर रेन्ज रहेको सुपेरियर मोडलको मूल्य ६७ लाख ८० हजार रुपैयाँ छ ।

यस्तै, बीवाईडीले यसको अर्काे विशेष मोडल सिलयान पनि प्रदर्शनीमा राखेको छ । यो गाडी नेपालमा मूल्यसहित कहिले सार्वजनिक हुन्छ भन्ने जानकारी भने आएको छैन ।

टाटा– टाटाको आधिकारिक वितरक सिप्रदी ट्रेडिङले नयाँ पञ्चडटईभी सार्वजनिक गरेको छ । पञ्चडटईभीको इम्पावर्ड प्लस एस एमआरको भेरियन्टको मूल्य ३३ लाख ९९ हजार रुपैयाँ छ । एलआर भेरियन्टको ३६ लाख ९९ हजार र पञ्चडटईभी इम्पावर्ड प्लस एस एलआरको मूल्य ३८ लाख ९९ हजार रुपैयाँ छ ।

स्काईवेल– जी मोटर्सले स्काईवेलका नयाँ गाडी सार्वजनिक गरेको छ । जसमा स्काईवेल बीई ४१० किलोमिटर रेन्ज र ५२० किलोमिटर रेन्जमा उपलब्ध छ । कम रेन्जको मूल्य ७५ लाख ९० हजार रुपैयाँ छ भने, माथिल्लो रेन्जमा उपलब्ध स्काईवेल ८५ लाख ९० हजार रुपैयाँ छ । स्काई वेलको ईटी५ को मूल्य एक करोड १० लाख रुपैयाँ छ ।

नेटा– सीजी मोटर्सअन्तर्गतकै नेटाको एक्स मोडल पनि शोमा सार्वजनिक भएको छ । नेटा एक्सका तीन भेरियन्ट छन् । जसमा नेटा एक्स ४०० कम्फर्टको मूल्य ५३ लाख ९९ हजार रुपैयाँ छ । यस्तै, नेटा एक्स ५०० कम्फर्टको मूल्य ५७ लाख ९९ हजार र नेटा एक्स ५०० लक्जरीको मूल्य ६२ लाख ९९ हजार रुपैयाँ छ ।

आयोन– सीजीले आयोन ब्रान्डको हाइपर ईभी र आयोन भी ईभी पनि प्रदर्शनमा राखेको छ । यी दुवै गाडीको मूल्य भने घोषणा हुन बाँकी छ । हाइपरको मूल्य एक करोडभन्दामाथि र आयोन भीको मूल्य ७० लाखभन्दा माथि रहने कम्पनीले जनाएको छ ।

रिड्डारा पिकअप– सीजीले भित्र्याएको मिडसाइज पिकअप रिड्डारा पनि शोमा सार्वजनिक भएको छ । रिड्डारा आरडी ६ को मूल्य ६४ लाख ९९ हजार रुपैयाँ छ ।

एक्सपेङ– सीजी मोटर्सले एक्सपेङ ब्रान्डका गाडी पनि शोमा सार्वजनिक गरेको छ । शोमा प्रदर्शनमा राखिएको एक्सपेङ जी६ को मूल्य ८४ लाख ९९ हजार रुपैयाँ छ ।

अवतार– सीजीले नै बिक्री गरिरहेको अवतार आईआई ईभी पनि नाडा अटो शोमा सार्वजनिक भएको छ । यसको मूल्य एक करोड ४५ लाख रुपैयाँ छ ।

दिपल– एमएडब्लू वृद्धि आधिकारिक वितरक रहेको दिपल ब्रान्डको नयाँ ईभी पनि शोमा राखिएको छ । जसमा दिपल ०७ को मूल्य ६९ लाख ९९ हजार रुपैयाँ छ । पहिलेदेखि नै बजारमा रहेको दिपल एस ०७ को मूल्य ७४ लाख ९९ हजार रुपैयाँ छ ।

जिकर– पयोनिर अटोकर्पले भित्र्याएको जिकर मोडलका दुई भेरियन्ट शोमा सार्वजनिक भएका छन् । जसमा जिकर एक्स रियर ह्वील ड्राइभको मूल्य ८९ लाख ९९ हजार र अल ह्वील ड्राइवको मूल्य एक करोड ५९ लाख ९९ हजार रुपैयाँ छ । 

केई– लक्ष्मी ई–मोबिलिटठी केईका दुई नयाँ ईभी सार्वजनिक गरेको छ । जसमा केई ई–क्युट ०२ को मूल्य १९ लाख ९६ हजार रुपैयाँ छ । केई ई–क्युट ०४ को मूल्य २४ लाख ९६ हजार रुपैयाँ छ ।

डोङफेङ नामी– एमएडब्ल्यू ग्रुपले नै भित्र्याएको डोङफेङ ब्रान्डको नामी ईभी पनि नाडा अटो शोमा राखिएको छ । नामीका तीन भेरियन्ट नामी ई१, नामी ई२ र नामी ई३ छन् । यी तीनवटै भेरियन्टको मूल्य क्रमशः २९ लाख ९९ हजार, ३१ लख ९९ हजार र ३४ लाख ९९ हजार रुपैयाँ छ ।

लिपमोटर– सांग्रिला मोटर्ससले नेपालमा ईभी ब्रान्ड लिपमोटर भित्र्याएको छ । शोमा सार्वजनिक लिपमोटरको सी१० गाडीको मूल्य ६७ लाख ९९ हजार रुपैयाँ छ ।

एमजी साइबरस्टर– एमजी मोटर्सको आधिकारिक वितरक पारामाउन्ट मोटर्सले स्पोर्ट ईभी कार साइबरस्टर सार्वजनिक गरेको छ । नाडामा सार्वजनिक भएको यो कारको मूल्य एक करोड ६८ लाख रुपैयाँ छ ।

जेकु– एसपीजी अटोमोबाइल्सले चेरीको जेकु ईभी ब्रान्ड नेपाल भित्र्याएको छ । शोमा सार्वजनिक जेकु जे६ को इलेक्ट्रिक एसयूभीको मूल्य ६९ लाख ९९ हजार रुपैयाँ छ । यस्तै, कम्पनीको ओमोडा ई५ डिलक्स ईभी पनि सार्वजनिक भएको छ । यसको मूल्य ५५ लाख ९९ हजार रुपैयाँ छ ।

भोल्टस– एसक्युब इन्टरप्राइजेजले भोल्ट्सको नयाँ ईभी एचइभी३०० सार्वजनिक गरेको छ । यसको मूल्य २५ लाख ९५ हजार रुपैयाँ छ ।

बीएडब्ल्यू– एलआरआर मोटर्सले बीएडब्ल्यू ब्रान्डको ईभी नेपाल भित्र्याएको छ । बीएडब्ल्यूको ब्रम्बी गाडीको मूल्य २१ लाख ९० हजार रुपैयाँ छ ।